DILI, 01 setembru 2023 (TATOLI)- Tribunál Judisiál Primeira Instánsia Dili, sesta ne’e, hahú rona deklarasaun hosi sasin ho inisial GS, nu’udar alin ba matebian José Bernardino ne’ebé mate iha sela Polísia Nasionál Timor-Leste (PNTL) munisipiu Díli, iha loron 31 setembru 2022.
Tribunál liuhosi Juiz José Maria notifika sasin ho insiál GS nu’udar alin hosi matebian José Bernardo atu rona uluk nia deklarasaun, molok rona deklarasaun hosi arguidu na’in-haat ne’ebe nu’udar membru Polisia Nasionál Timor-Leste.
Notísia relevante: Kazu joven mate iha sela, MP haruka ona ba Tribunál
Tribunál rona uluk sasin GS nu’udar mateabin nia alin rasik ho baze ba Kódigu Prosesu Penál artigu 230 ne’ebé hanaran dekasaun memoria futuru atu rona testamuña prinsipál.
“Tribunál rona uluk sasin ne’e para atu evita prova sira ne’ebé arolla ona hosi Ministeriu Públiku labele lakon. Tanba ne’e Tribunál hasai despaixu hodi notifika sasin hodi mai fó depoimentu mai iha Tribunál,” Defensór Públiku Estaqui Guterres ba jornalista sira iha TJPID, Colmera
Defesór Públiku ne’e dehan sasin ba kazu ne’e deklara momentu matebian José Bernardino ba presta deklasauun iha polísia hetan akompañamentu direta hosi nia ho nia ama.
“Sasin deklara polísia bá bolu matebian ne’e iha nia uma, nune’e atu identifikasaun no momentu lori matebian ba halo identifikasaun hetan akompanamentu hosi nia no nia ho nia inan rasik,hafoin ida ne’e sira rua fila ona bá uma. Hela mesak matebian mak iha sela detensaun no saida mak akontese sira la hatene,”nia afirma.
Hafoin Tribunál rona sasin sasin nia depoimentu Tribunál adia prosesu julgamentu ba kazu José Bernardino ba outubru, atu julga fali arguido na’in-haat nu’udar membru PNTL.
Julgamentu ba kazu matebian José Bernardino ne’e preside hosi Juiza Sigulár Albertina Neves no Ministériu Públiku reprezenta hosi Hernanio Rangel, enkunatu sasin hetan asisténsia legál hosi Defensór Públiku Estaqui Guterres. Arguidu sira mós hetan asisténsia legál hosi advogadu privadu.
Notísia relevante: Tribunál hahú julga kazu joven mate iha sela Caicoli
Jornalista: Natalino Costa
Editór : Florencio Miranda Ximenes
