Médiku iha ró “Peace Ark” fó ona tratamentu saúde ba timoroan
DILI,04 setembru 2023 (TATOLI)—Médiku na’in-126 ne’ebé iha ró ospitál militar “Peace Ark” hosi nasaun Xina, segunda ne’e, fó ona tratamentu saúde espesializadu ba komunidade timor-oan sira iha portu Dili.
“Pasiente sira konsege halo ona tratamentu saúde, maibé ita fó uluk ba idozu sira tanba limitasaun ekipa médiku sira husi Xina,” dehan Ministra Saúde, Elia dos Reis Amaral, ba jornalista sira, iha portu Dili.
Governante ne’e afirma, ai-moruk sira ne’ebé mak lori husi Xina ho kualifikadu tebes, tanba ne’e husu atu timor-oan sira uza oprtunidade ne’e hodi halo tratamentu saúde.
Iha fatin hanesan, Diretór HNGV, Marcelino Correia, informa pasiente na’in-10 hosi HNGV mak sei halo operasaun laparoscopy, operasaun ba tilun na’in lima, husi gastroenterology na’in-lima, husi ortopedia na’in -lima, matan na’in-lima no obstetric mak daudaun prepara hela inklui neurology nian.
“Husi lista sira ne’e mak ita entrega hela mai médiku Xineza sira atubele halo operasaun. Nune’e husu populasuan sira mai halo tratamentu iha portu Dili, atu nune’e bele hetan tratamentu saúde,” nia afirma.
Pasiente agradese
Timoroan hato’o agradesementu ba médiku espesialista iha ró opsitál Militár ne’e tanba bele fó tratamentu saúde ba sira hod kualidade.
Tuir pasiente Tiborcio do Santos husi munisípiu Lautem, hato’o agradese tebes ba Governu Timor Leste ne’ebé mak halo kooperasaun ho Governu Xina, hodi mai fó asisténsia médiku iha ba pasiente sira.
“Ha’u durante ne’e sofre hela moras rins, maibé sente kontente tanba bele halo ona tratamentu espesializadu husi médiku Xineza ho di’ak tebes,” nia agradese.
Biban hanesan, Abitante Dili, Martinho Gomes, lamenta ho atendimentu iha portu Dili tanba laiha espasu hodi hetan tratamentu saúde husi ekipa médiku Xineza.
“Ha’u agradese ba Estadu Xina no Timor Leste nia kooperasaun ne’ebé di’ak, maibé ha’u ladun aseita mak atendimentu iha laran ne’e la fó espasu atu ami tama ba halo tratamentu saúde,” nia afirma.
Tuir oráriu atendimentu hosi Ekipa Médiku Ró Ospitál Xina nian maka tuir mai, iha loron 04 setembru 2023 fó atendimentu ba públiku hahú tuku 08:00 to’o 11:30, dadeer no lokoraik tuku 13:00-17:30 otl
Entretantu, iha loron 05 setembru, Ekipa Médika Xina ida sei halo vizita no fó tratamentu iha Sentru Saúde Liquiça.
Iha loron 06 setembru, Ekipa Médika Xina sei halo vizita no fó tratamentu iha Sentru Saúde Ataúro. Iha loron 07 setembru, Ekipa Médika Xina sei halo vizita no fó tratamentu ba F-FDTL no PNTL. Loron 08 setembru Ekipa Médika Xina sei halo vizita no fó tratamentu ba baze Navál Hera.
Notísia relevante: Ró ospitál Xina “Pace Ark” sei mai fó asisténtsia ba komunidade TL
Jornalista : Felicidade Ximenes
Editór : Florencio Miranda Ximenes
