Agostu : Sentru Saúde Laleia rejista moras ISPA hamutuk 15
DILI, 05 setembru 2023 (TATOLI) – Xefe Sentru Saúde Laleia, Jose da Costa, hateten iha fulan agostu nia-laran, Sentru Saúde Laleia rejista moras Infesaun Vias Respiratóriu Aguda (ISPA) hamutuk 15 ne’ebé afeta ba labarik no ema boot sira.
“Durante fulan agostu, moras Infesaun Vias Respiratóriu Aguda (ISPA) mak ita rejista iha sentru saúde Laleia ne’ebé afeta ba labarik no ema boot hamutuk 15”, Jose da Costa informa ba TATOLI via telephone, ohin.
Nia dehan, kazu ISPA ne’e ninia kauza mai husi respiratóriu, alergia, ahi suar, rai rahun. Klima agora ne’e ema sunu duut, anin boot.
“Ita hatene katak daudaun ne’e bailoron entaun moras ISPA ne’e domina ezemplu hanesan ita sunu rai, ahi suar, husi buat sira ne’e mak impaktu ba ita atu hetan moras ISPA ida ne’e”, nia esplika.
Nia hateten, prevensaun ba moras ne’e mak hanesan aternativu di’ak liu mak uza maskara bainhira atu desloka ba fatin ruma.
“Bainhira atu halo prevensaun ba moras ne ‘e mak ba ne’ebé deit uza maskara atu nune’e evita rai rahun sira ne’e”, nia reforsa.
Nia apela ba populasaun iha Postu Administrativu Laleia Munisípiu Manatuto katak bainhira afeta ona moras ne’e ba lalais konsulta iha fasilidade saúde ne’ebé mak besik.
“Ha’u husu ba populasaun sira iha Laleia katak bainhira afeta ona moras ne’e ba lalais konsulta iha fasilidade saúde ne’ebé mak besik hodi hetan atendimentu husi profisionál saúde sira”, nia konklui.
Jornalista : Felicidade Ximenes
Editór : Zezito Silva
