Ai-han supersereál ba inan isin rua estoke mamuk iha Sentru Internamentu Vera Kruz
DILI, 06 setembru 2023 (TATOLI) – Koordenadór Programa Sentru Internamentu Vera kruz, António da Cruz, informa ai-han supersereál ba inan isin rua no inan fó susu, daudaun ne’e, estoke mamuk iha sentru Saúde Vera Kruz.
“Aihan supersereál ne’ebé ne’ebé oferese ba inan isin rua no mós inan fó susu afeta má nutrisaun, daudaun ne’e, estoke mamuk iha Vera Kruz, tanba ai-han supersereál ida ne’e hotu iha fulan juñu mai to’o agora seidauk iha inklui mos ai-han planpinat ne’ebé fó ba labarik sira ne’ebé mak má nutrisaun mós la iha”, António da Cruz, ba TATOLI iha nia kna’ar fatin Sentru Saúde Vera Kruz, ohin.
Nia informa, bainhira ai-han supersereál ne’e la iha mak médiku sira halo karta pedidu ba Servisu Saúde Munisípiu Dili atu haree ba ida ne’e maibé to’o agora la iha solusaun.
“Ai-han nutritivu ida ne’e hotu, ami-nia superiór sira hatene ona inklui WFP maibé sei hein orsamentu ruma karik, entaun ami hein de’it bainhira sira distribui mai, ami distribui tutan fila fali ba inan isin rua no fó susu ne’ebé mak hetan má nutrisaun”, nia esplika.
Nia afirma, durante ne’e ai-han nutritivu la iha, profisionál saúde sira lorloron halo akonsellamentu ba inan sira oinsá prepara rasik ai-han nutritivu hodi hadia labarik sira-nia nutrisaun.
“Prepara ai-han nutrisaun di’ak ba ita-nia oan sira para nafatin forsa liuliu modo tahan, manu tolun, tahu no tempe, entaun ida ne’e mak loroloron ami halo akonsellamentu ba inan aman sira ne’ebé mak mai halo tratamentu saúde iha Vera Kruz tanba ita haree ema moris iha Dili ne’e hotuhotu servisu, entaun presiza haree nutrisaun di’ak ba labarik sira tanba sira mak futuru nasaun nian”, nia reforsa.
Nia akresenta, iha fulan agostu, Sentru Saúde Vera Kruz rejista labarik ho idade fulan neen to’o tinan lima ne’ebé mak afeta ba má nutrisaun hamutuk 144. No ba inan isin rua no inan fó susu hetan má nutrisaun hamutuk 106.
Jornalista : Felicidade Ximenes
Editór : Zezito Silva
