Juventude Letefoho husu MJDAK harii kampu multifunsaun
DILI, 06 setembru 2023 (TATOLI) – Juventude sira iha Postu Administrativu Letefoho, Munisípiu Ermera husu ba Ministériu Juventude, Desportu, Arte no Kultura (MJDAK), kria espasu desportiva ba joven sira hodi pratika desportu.
Koordenadór Juventude Parokia Letefoho Jacob Perreira dos Santos, hateten Postu Letefoho, Munisípiu Ermera iha kampu futeból bo’ot ida de’it nune’e juventude sira hakarak husu ba MJDAK atu bele fasilita hela sira hodi kria kampu futsal multifunsaun ida iha sira-nia postu.
“Kampu multifunsaun ne’e bele utiliza ba jogu amizade iha Postu Letefoho no mós prepara jogadór foun sira hodi bele kompete iha liga sira ne’ebé maka kria iha kapitál Dili”, Jacob dehan liuhosi komunikadu ne’ebé Agência TATOLI asesu, hosi media MJDAK, ohin.
Hatan ba preokupasaun juventude sira nian ne’e, Ministru Nélio Isaac Sarmento, kompromete apoio fasilidade desportiva iha Letefoho.
“Husu ba juventude sira tenke iha unidade no responsabilidade hodi kria relasaun di’ak ho autoridade lokál sira, inan no aman, veteranu sira, administradór postu, Polísia Nasionál Timor-Leste (PNTL), inklui Padre no Madre sira ne’ebé maka iha Parokia Letefoho. Ba autoridade lokál sira atu kopera ho juventude sira nune’e juventude sira bele atinje sira-nia espetativa no planu ne’ebé maka sira trasa, Governu sei ajuda ita-boot sira”, Ministru Nélio.
Jornalista: Hortencio Sanchez
Editór : Zezito Silva
