DILI, 07 setembru 2023 (TATOLI) – Governadór Lembaga Ketahanan Nasionál Republik Indonésia (LEMHANNAS), Andi Widjajanto, hamutuk ho delegasaun halo vizita hodi hasoru malu ho Ministru Interiór em ezersísiu, atuál Sekretáriu Estadu Protesaun Sivíl (SEPS), Domingos Mariano Reis, hodi fortalese kooperasaun servisu liuhosi formasaun iha área seguransa interna nian.
“Ita simu vizita hosi Governadór ho nia delegasaun sira no ita koalia liu kona-ba hametin kooperasaun bilaterál entre Timor-Leste no Indonézia, em termus kapasitasaun ba lideransa Polísia Nasionál Timor-Leste (PNTL) ninian, liuliu formasaun ba postu jenerál sira ao mesmo tempo hodi halo estudu komparativu husi Indonésia mai Timor-Leste iha instituisaun tutela Ministériu Interiór”, hateten Domingos Mariano Reis, ba jornalista-sira iha edifisiu MI Vila-Verde, ohin.
Nia dehan, Lemhanas hanesan instituisaun ida ne’ebé bele fó formasaun ho konseitu Jeopolítiku, Jeostratégiku iha doutrina rejiliénsia nasionál no sistema jestaun iha ámbitu dezenvolvimentu nasionál nian.
“Ita ko’alia mós kona-ba hametin kooperasaun entre nasaun rua iha promosaun mitigasaun hodi responde ba ameasa la-nina (udan boot) ne’ebé kauza ba risku dezastre sira hanesan inundasaun no rai halai inklui fenómena el-nino (bailoro naruk), ne’ebé fo impaktu bo’ot ba iha produsaun alimentár”, nia dehan.
Governante ne’e hatutan, ho kooperasaun hirak ne’e, nia iha ona estratéjia ba preparasaun sustentável hodi aumenta rejiliénsia komunidade vulneravél iha teritóriu tomak wainhira mosu dezastre naturál.
Widjajanto, hateten vizita ida ne’e lori mós péritu sira hodi hatene kle’an kona-ba polítika hosi Ministériu Interiór nian iha area seguransa.
“Ami-nia vizita ne’e envolve mós dosente sira hodi hatene papel Ministériu Interiór nian no mós kooperasaun iha formasaun lideransa, rekursu humanu ba dezenvolvimentu nasaun nian”, dehan Governador ne’e.
“Ami mós diskute kona-ba polítika Timor-Leste nian ba redusaun populasaun liuliu ba persepsaun kona-ba planeamentu familiár hodi halo sensibilizasaun liuhosi edukasaun saúde”, nia aumenta.
Governadór Lemhanas ne’e hatutan, hosi instituisaun ida-ne’e hamosu ona kuadru lideransa potensiál no profisional iha área peskiza nian iha konseitu sira polítika administrasaun Estadu nian.
Iha vizita ne’e, delegasaun hosi Indonézia ne’ebé akompaña Governadór Lemhanas maka dosente sira ho postu jenerál hosi TNI no POLRI, adidu defeza hosi KBRI enkuantu akompaña SEPS maka eis jenerál PNTL, ne’ebé antes ne’e frekuenta ona programa Estudu (PPSA) klasse 24 Lemhanas iha Indonézia, hamutuk ho asesór lokál no internasionál.
Jornalista: Hortencio Sanchez
Editór : Zezito Silva
