Governu ezonera Adino Cabral hanesan adjuntu PCIC
DILI, 08 setembru 2023 (TATOLI) – Ministériu Justisa hasai ona despaixu ho Nú 46/GMJ-D/09/2023 hodi ezonera Adjuntu Diretór Polísia Sientífika Investigasaun Kriminál (PCIC-sigla portugés), Adino Nunes Cabral.
“Iha administrasaun públika ne’e troka lideransa normál, iha PCIC ne’e tuir estatutu kada tinan rua iha renovasaun, entaun ida ne’e ita halo reforma ida iha instituisaun atu hadia duni PCIC ne’e, tanba programa Governu nian ko’alia momoos katak atu reforma ba PCIC, ida ne’e mak agora ita halo nune’e bele halo servisu PCIC nian ho efikas no efisiente”, Ministru Justisa, Amandio de Sá Benevides dehan ba jornalista sira iha edifísiu Ministériu Justisa, ohin.
Nia dehan, Adjuntu PCIC ne’ebé Governu ezonera tanba asume kna’ar iha PCIC liu ona tinan lima.
“Estruturalmente duplikadu demais, sira iha departementu investigasaun, ha’u haree adjuntu mós dalaruma halo hotu kna’ar investigasaun hotu, entaun di’ak liu nia ba fali investigasaun de’it, ita haree ho adjuntu atu apoiu servisu diretór nian, mais ha’u haree hosi relatóriu servisu duplikadu demais, di’ak liu iha Diretór mai liu departementu investigasaun de’it, lei hateten tenke iha adjuntu maibé lei ita halo para rezolve situasaun, maibé ministru haree, ita presiza halo reforma tenke halo reforma”, ministru hateten.
Ho reforma ne’ebé Governu halo ba PCIC, governante ne’e fiar katak ba oin sei hatudu progresu servisu ne’ebé di’ak liu.
“Diretór PCIC agora ne’e sei mantein nia pozisaun, kualker tempu bele iha mudansa maibé agora ita sei mantein ho ida agora ne’e”, nia relata.
Nia hatutan, ezonerasaun ba adjuntu ne’e la’os komete kazu ruma maibé halo reforma ba instituisaun.
“La’os kazu ruma mak hodi ezonera adjuntu, ne’e la’e, maibé atu reforma instituisaun”, nia friza.
Aleinde ne’e, ministru mós fó ona orientasaun ba PCIC atu labele utiliza arma fogu bainhira la iha investigasaun ne’ebé fó ameasa ba sira-nia vida.
“Investigasaun ne’ebé boot fó perigu ba sira-nia vida, sira iha direitu bele utiliza arma fogu tuir lei fó, maibé agora despaisu tun ona, la iha membru ida mak kaer arma ba festa, ba tur iha otél, restaurante no seluk tan, arma hotu iha hotu armajen PCIC nian”, nia hakotu.
Jornalista: Hortencio Sanchez
Editór : Zezito Silva
