Governu halo diálogu ho OAM buka solusaun ba konflitu
DILI, 08 setembru 2023 (TATOLI) – Vise Primeiru-Ministru no Ministru Dezenvolvimentu Rurál no Habitasaun Komunitária, Mariano Assanami Sabino, dehan Ministru Juventude Desportu Arte no Kultura (MJDAK), Nélio Isaac Sarmento no Prezidente Komisaun Reguladora Arte Marsiál (KRAM) Octavio da Conceição halo diálogu ho Organizasaun Arte Marsiál (OAM) tolu hodi buka solusaun ba konflitu ne’ebé akontese iha fatin-fatin.
OAM ne’ebé hala’o diálogu ho Governu mak Persaudaraan Setia Hati Terate (PSHT), IKS-PTL no Kmanek Oan Rai Klaran (KORK).
“Enkontru ho Arte Marsiál hirak ne’e atu ko’alia ba sira oinsa kontrola membru sira atu bele kontribui ba paz iha nasaun ida ne’e, ita-nia nasaun ne’e sosa ho ruin no ran ho nune’e ita foin sa’e mak tenke kontribui hodi dezenvolve”, Assanami dehan ba jornalista sira iha edifísiu MJDAK Lecidere, ohin.
Iha okaziaun ne’e, Governu husu ba OAM sira atu fó mós formasaun morál ba membru hotu atu membru sira bele iha konsiénsia hodi labele kria bebeik konflitu ba malu.
“Governu husu ba lider másimu Arte Marsiál sira atu labele fó de’it formasaun fizíku ba membru sira maibé fó mós formasaun morál atu membru sira iha konsiénsia hodi kria paz no estabilidade ba malu, atu ita foku ba dezenvolvimentu hadia rai ne’e ba oin”, Assanami dehan.
Nia dehan, Governu prontu fasilita OAM iha parte saida de’it maibé, OAM mak tenke fó duni formasaun ba membru sira, tanba liuhosi meiu ne’e mak bele redúz konflitu iha nasaun ne’e.
Iha fatin hanesan, Prezidente KRAM Octavio, reforsa reuniaun ne’e ho lider OAM no treinadór sira hosi munisípiu hotu iha Timor-Leste hodi halo diskusaun atu bele buka solusaun ba problema sira ne’ebé akontese iha teritóriu nasionál.
“Ami iha kompeténsia tomak atu asegura polítika Governu nian atu kontinua ko’alia ho lider Arte Marsiál sira atu oinsa mak kontribui ba páz iha nasaun ida ne’e. Iha Enkontru ne’e ami mós ko’alia kona-ba implementasaun lei No. 5/2017 no segunda diretiva KRAM ne’ebé mak distribui ba lideransa Arte Marsiál hotu”, dehan Octavio.
Governu sei aplika lei No. 5/2017 no segunda diretiva KRAM ne’ebé iha ona, bainhira bairo no munsípiu ne’ebé la kontribui ba páz mak sei suspende atividade arte marsiál hotu to’o rezolve ona problema mak bele re-ativa hikas no la rezolve problema sei suspende totál no OAM sira hotu laiha tan direitu absoluta ba hala’o atividade.
Prezidente KRAM reforsa tan problema asalta malu ne’ebé akontese iha Munsípiu Baucau la’os organiza hosi OAM maibé adeptus hosi futeból ne’ebé ba haree jogu futsal fila mak asalta malu.
“Ha’u simu ona informasaun kona-ba Baucau nian, mais ne’e la’os organizasaun mak organiza nia membru sira ba asalta malu, akontese ne’e adeptu sira ne’ebé ba nontong bola futsal fila iha dalan mak asalta malu, maske indika membru balu maibé ida ne’e ita konsidera problema individu, la’os arte marsiál”, nia konfirma.
Governu sei halo mós ho Organizasaun Arte Rituál (GAR) sira iha tempu besik atu nune’e tau matan ba membru sira labele kria tan konflitu.
Jornalista:Hortencio Sancehez
Editór : Zezito Silva
