Xina pretende koopera ho TL dezenvove setór agrikultura
DILI, 10 setembru 2023 (TATOLI) – Ministru Negósiu Estranjeiru no Kooperasaun (MNEK), Bendito dos Santos Freitas, enkontru kortezia ho Governadór hosi Provínsia Hunan Xína, Mao Weiming ho delegasaun, hodi ko’alia kona-ba servisu kooperasaun iha setór agrikultura.
Liuhosi komunikadu ne’ebé Agência TATOLI asesu ohin, Ministru Bendito Freitas informa, presiza hametin liután kooperasaun bilaterál entre Timot-Leste ho Xína, tanba Hunan hakarak atu dezenvolve setór agrikultura iha Timor-Leste no mós setór importate seluk hanesan saúde, edukasaun no seluk tan.
“Hunan parte ida koñesidu tebtebes kona-ba projetu agrikultura nian, ne’ebé durante ne’e mós iha kooperasaun kona-ba servisu batar hibridu, projetu ne’e la’o tiha ona, tanba ne’e mak projetu importante tebes, sira-nia vizita mai ne’e atu haree ba ida-ne’e, haree mós kona-ba agrikultura, setór turizmu, edukasaun, saúde, tanba ne’e mak ita presiza tebes atu aselera ita-nia kooperasaun ho Governu Hunan”, Freitas dehan.
Ministru Bendito dehan, Governadór Hunan mós admira ho produtu agríkola iha Manatutu hanesan modo, aifuan no seluk tan, tanba ne’e, sira hakarak atu investe mós iha setór agríkola nian.
Nia afirma, presiza hametin liután kooperasaun bilaterál ho Sidade Hunan-Xína, nune’e bele prodús efeitu multiplikadór, hanesan formasaun kapasidade ba dezenvolvimentu agrikultura, turizmu, indústria no mós indústria ba fábrika hena nian.
Governadór Mao Wiming mós konvida Ministru MNEK, Bendito Freitas, vizita Sidade Hunan hodi haree kona-ba prioridade ne’ebé sira atu fó ba Timor-Leste, tanba Hunan hanesan mós sentru referénsia ba estudu kona-ba fortifikasaun iha área agrikultura nian liuliu investigasaun ba fertilidade rai-nian.
Jornalista: Hotencio Sanchez
Editór : Zezito Silva
