Assanami ho OMS diskute kestaun saúde iha TL

DILI, 12 setembru 2023 (TATOLI) – Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, hasoru malu ho delegasaun hosi Organizasaun Mundiál Saúde (OMS) ne’ebé reprezenta hosi Arvind Marthur hodi diskute kestaun saúde iha Timor-Leste.

“Diskusaun ne’e foka liubá sistema saúde ne’ebé IX Governu ho komitmentu oinsá bele kria preparasaun emerjénsia ba sistema saúde hodi koresponde ba dezenvolvimentu kapitál umanu”, tenik iha komunikadu ne’ebé Agência TATOLI asesu, ohin.

Iha enkontru ne’e diskute mós asuntu sira hanesan kontrola tabaku, diabetes, má-nutrisaun, stunting no seluk tan, tanba ne’e presiza iha liña koordenasaun ho parseiru interministeriál sira.

Aleinde ne’e, diskute mós koobertura saúde universál no moras la da’et sira oinsá bele prevene, iha Timor-Leste, elimina ona moras rubela no sei elimina mós moras sarampu, tanba ne’e, OMS kontinua apoiu servisu ne’e no kolabora ho Ministériu Saúde hodi elimina tan moras malaria iha futuru.

Jornalista: Hortencio Sanchez

Editór : Zezito Silva