Top

Deskonfia diplomata balun hatama kilat musan ho ilegál mai TL   

Ministru Interiór, Francisco da Costa Guterres . Imajen Tatoli/António Daciparu

DILI, 12 setembru 2023 (TATOLI) – Deskonfia iha diplomata balun ne’ebé rezidente iha Timor-Leste ne’ebé lori kilat musan ho ilegalmente mai Timor-Leste.

Ministru Interiór, Francisco da Costa Guteres, simu informasaun katak iha diplomata ida balun ne’ebé rezidente iha Timor-Leste hatama kilat musan ho ilegál mai Timor-Leste bainhira diplomata ne’e fila hosi nia nasaun orijen.

Governante ne’e hateten, hanesan Ministru Interiór simu informasaun katak iha sidadaun estranjeiru ida halo funsaun nudar diplomata ne’ebé rezidente iha Timór hatama kilat musan rua nulu mai Timor-Leste. Bainhira sidadaun estranjeiru ne’e to’o iha Aeroportu Internasionál Nicolau Lobato, PNTL deteta kedan no halo apreensaun ba kilat musan rua 20 ne’e.

“Sim, iha informasaun katak iha bala musan rua nolu ne’ebé ita-nia sidadaun estranjeiru ida mak hatama mai. Nia ema diplomata ida. Ita kontatu ona Embaixada hosi ema ne’e ninian. Tanba nia diplomata, nia iha imunidade entaun ita halo ivestigasaun no husik fali nia hodi entrega fali ba nia embaixada. Maibé ita sei la husik nia sai para depois nian submete ba prosesu investigasaun”, Francisco da Costa Guteres ba jornalista sira iha Ministériu Finansas, tersa, ohin.

Governante ne’e louva servisu PNTL nian tanba bele halo servisu di’ak no profisionál tebes hodi bele deteta ema estranjeiru ne’ebé lori bala musan ho ilegál mai Timor-Leste.

“Ita louva sira, tanba sira halo kontrolu iha fronteira ne’e ho di’ak tanba sira konsege deteta bala musan rua nolu hosi diplomata ne’e. Sira ne’e kalau servisu di’ak duni ne’e mak ita deteta kilat musan kuandu sira la servisu di’ak entaun sira la deteta, ita haree sira servisu di’ak mak sira deteta ne’e”, nia dehan.

Nia dehan, tuir prosedimentu katak kualker sé de’it mak movimentu hodi tama no sai mak lori kilat musan tenke liuhosi lisensa.

“Ó labele lori bala musan iha kualker movimentu, kuandu iha prosesu lori bala musan ne’e tenke liuhosi prosedmentu sira. Ita tenke liuhosi nota lisensa para lori tama sasan sira ne’e karik tenke iha lisensa”, nia refere.

Nia dehan, bala-musan ne’ebé mak foin daudaun PNTL sira halo apreensaun iha Aero Portu tanba laiha lisensa no kategoriza ilegál.

”Kuandu sira atu lori sai ka lori tama bala-musan sai, sira tenke iha lisensa, se la iha lisensa ne’e mak ita ka’er ne’e, ida ne’e hatudu katak ilegal”, Governante ne’e afirma.

Rekorda katak iha sábadu (10/9) foin daudaun ne’e, iha tuku 11:00 dader, iha sidadaun estranjeiru ida ho insiál CB lori tama bala musan hamutuk 20 bainhira to’o iha Aeroportu  Nicolau Lobato, X-Ray deteta bala-musan ne’ebé sidadaun ne’e lori no servisu Aeroportu halo kedan kontatu ba autoridade seguransa hodi halo apreensaun.

PNTL asegura kedan sidadaun estranjeiru ne’e ho evidénsia sira, lori kedan ba Departementu Investigasaun Kriminál Nasional Komandu Jerál  PNTL hodi submete ba prosesu investigasaun.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!