Top

Governu: Konfrontu AM mantein atividade ameasadu taka

Ministru Interiór, Francisco da Costa Guterres. Imajen /TATOLI

DILI, 12 setembru 2023 (TATOLI) – Ministru Interiór (MI), Francisco da Costa Guteres, hateten, kuandu konfrontu arte marsiál kontinua akontese iha teritóriu nasionál mak Governu sei deside taka atividade tomak.

Nia dehan, Governu husu ona ba Grupu Arte Marsiál (GAM) sira atu kontrola ninia membru sira, kuandu sira kontinua envolve konfrontu iha fatin ne’ebé de’it mak Governu la iha dalan seluk no sei deside hodi taka atividade arte marsiál.

“Ita agora husu sira-nian konsiénsia, ita fó tempu para sira bele rezolve sira-nia problema hotu ka lae, se la rezolve mak pasiénsia, entaun ami foti desizaun ida ne’e”, Guteres ba jornalista sira ha Ministériu Finansa, tersa ohin.

Governante ne’e sei fó biban ba GAM sira atu buka hodi kontrola membru sira idak-idak atu bele koopera ba estabilidade hodi labele hamosu konfrontu, kuandu iha membru ida mak envolve konfrontu ne’e responsablidade GAM no tenke responsabliza.

Tanba ne’e, Governu sei fó tempu ba arte marsial sira atu iha konsiénsia hodi rezolve problema sira ne’ebé akontese iha territóriu nasionál.

“Ita fó hela kbi’it ba sira, ita la’os foti de’it desizaun atu taka ka la’e, maibé ita fó tempu ba sira, imi bele rezolve imi-nian problema ka lae, imi bele kontrola imi-nian membru sira ka lae, ita tenke hanesan ne’e, ita tenke koalia ba malu, sé imi labele ona, Estadu foti desizaun”, nia dehan.

Tuir nia, arte marsiál ne’e la hanorin ema atu oho ema, la hanorin atu ó halo asaun hasoru ema ne’ebé kbi’it la’ek.

Tanba ne’e, Ministériu Interiór halo ona kordenasaun ho Ministru Juventude Desportu  no Arte Kultura hodi bolu Komisaun Reguladora Arte Marsiál (KRAM) atu esplika  diretiva ne’ebé mak sira halo ona hodi regula atividade arte marsiál, nune’e MI bele hatene ida ne’e.

Guteres mós hateten, MI, MJDAK no KRAM sei halo rezolusaun ida hodi sertifika no kontrola atividade GAM sira di’ak liután bainhira sira halo atividade liuliu dirijente arte marsiál sira tenke responsabliza nian membru sira bainhira komte krimi.

“Ami koalia ona Ministru Juventude ne’ebé halo mós kontrola ba KRAM hodi hasai rezolsaun ida, ami haree para ami sertifika hodi bele implementa, karik membru arte marsiál ida envolve konfrontu iha área Becora mak buka nia responsavél hodi bele responsabliza ba aktu ne’e”, nia afirma.

Nia dehan, GAM sira ne’e la’os hatene fó treinu ema maibé la hatene kontrola nia ema sira baihira envolve iha konfrontu.

“Sé ita bo’ot nia membru komete buat ruma, ita bo’ot mak responsabliza”, nia adianta.

governante ne’e bolu ona Komandante Jerál PNTL atu intensifika seguransa iha tempu kalan liuhosi la’o ain ho Polisiamentu Komunitáriu nune’e bele rezolve problema ne’ebé akontese iha bairru, atu nune’e garante pás no estabilidade iha povu.

“Horseik ha’u bolu ona Komandante Jerál atu intensifika seguransa iha tempu kalan liuhosi patrollamentu la’o ain no reativa polisiamentu komunitáriu hodi bele rezolve problema iha sosidade”, nia dehan.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!