Xefe Estadu enkoraza servisu INDDICA redúz violasaun ba direitu labarik
DILI, 12 setembru 2023 (TATOLI) – Prezidente Repúblika José Ramos Horta enkoraza Institutu Defeza ba Direitu Labarik (INDDICA-sigla portugés) atu servisu másimu hodi bele redúz númeru violasaun ba direitu labarik iha Timor-Leste.
“Prezidente Repúblika husu ami atu kontinua nafatin ho servisu ne’ebé iha no prezidente apoiu tebes ami-nia servisu, ba futuru ami sei iha kooperasaun servisu”, Prezidente INDDICA Dinorah Grandeiro dehan ba jornalista-sira iha Palásiu Prezidensiál Bairro Pite, hafoin remata sorumutuk ho Xefe Estadu.
Prezidente Repúblika husu ba INDDICA atu tau atensaun ba labarik sira hodi fó protesaun no promove direitu labarik iha Timor-Leste.
INDDICA atualiza ba Prezidente Repúblika kona-ba situasaun atuál labarik hotu nian no lala’ok servisu INDDICA nian.
“Ba oin INDDICA sei servisu hamutuk ho Prezidente Repúblika hodi responde ba situasaun labarik nian ne’ebé daudaun ne’e akontese iha ita-nia rai”, nia relata.
Tuir dadus ne’ebé INDDICA rekolla dezde 2019, labarik hamutuk 200-resin mak faan sasan iha merkadu no dalan ninin.
“Labarik 200-resin mak halao atividade negósiu ka faan sasan iha merkadu no dalan ninin, ida ne’e kauza hosi ekonomia família, maibé labarik hirak ne’e maioria mak la abandona sira-nia eskola, sira nafatin eskola, utiliza tempu livre mak sira ba faan sasan hodi sustenta nesesidade uma-laran nian”, nia informa.
Atu redúz violasun direitu labarik, INDICA prepara ona dekretu lei ida maibé seidauk aprezenta ba Konsellu Ministru maibé iha Governu foun ne’e INDDICA sei submete atu hetan aprovasaun atu bele proteje labarik sira hosi violasaun direitu no seluk tan.
Jornalista: Hortencio Sanchez
Editór : Zezito Silva
