iklan

NASIONÁL, HEADLINE

PR Horta desloka bá Nova Iorke partisipa Asembleia Jerál ONU dala-78

PR Horta desloka bá Nova Iorke partisipa Asembleia Jerál ONU dala-78

Prezidente Repúblika, José Ramos Horta. Imajen Tatoli/Egas Cristóvão

DILI, 15 setembru 2023 (TATOLI)-Prezidente Repúblika (PR), José Ramos-Horta, sesta ne’e, desloka bá Nova Iorke, hodi partisipa iha Asembleia Jerál Organizasaun Nasaun Unida (ONU) ba dala-78.

Iha loron 17 to’o 23 setembru 2023, Xefe Estadu reprezenta Timor-Leste partisipa iha enkontru nível a’as ne’e no sei fó deklarasaun iha sesaun ne’ebé sei realiza hosi fulan-setembru to’o dezembru 2023.

“Líder mundu sira hamutuk iha Nova Iorke ba abertura sesaun Asembleia Jerál ONU ba dala-78 no atu partisipa iha debate jerál nível a’as anuál ho tema rekonstrui konfiansa no hametin solidariedade globál: aselera asaun kona-ba ajenda 2030 no ninia Objetivu Dezenvolvimentu Sustentável (ODS) nian ba pás, prosperidade, progresu no sustentabilidade ba ema hotu,” refere nota ne’ebé Agência Tatoli asesu, sesta ne’e.

Nota ne’e sita katak, Xefe Estadu sei fó deklarasaun nasionál iha debate jerál iha loron 21 setembru 2023, atu fahe progresu ne’ebé Timor-Leste atinje ona iha dezenvolvimentu polítiku no ekonómiku iha tinan hirak ikus ne’e.

Xefe Estadu mós sei partisipa iha diálogu kona-ba dezenvolvimentu sustentável ho tema ‘halo reziliénsia no la husik ema ida iha kotuk’. Prezidente Repúblika mós konfirmadu marka prezensa iha resepsaun ne’ebé organiza hosi Prezidente Estadu Unidu Amérika, Jose Robinette Biden Jr.

Notísia relevante : PR Horta hala’o vizita Estadu ba rai-li’ur importante ba relasaun diplomátika

Aleinde ne’e, Prezidente Horta sei hato’o diskursu importante ida kona-ba ‘investimentu iha seguransa ai-han: solusaun inovativu sira atu rezolve Krize hamlaha’, iha sede ONU nian.

Sei partisipa iha eventu ida-ne’ebé organiza hosi misaun Tailándia kona-ba ‘promove parseria ba ita-nia futuru komún: haforsa parseria multi-stakeholder ba aselera ODS iha ASEAN, no iha Organizasaun Mundiál Saude (OMS) organiza konferénsia kona-ba prevensaun no kontrola moras la komunikável’.

PR sei partisipa iha eventu paralela nível a’as kona-ba rekorda solidariedade globál, hametin dame no konstrui reziliénsia iha país sira ne’ebé afeta hosi konflitu no frajilidade, ne’ebé organiza hosi g7+ iha loron 22 setembru 2023. Eventu ne’e organiza hamutuk hosi Timor-Leste no Sierra Leoa, ne’ebé nu’udar Prezidente g7+ atuál.

Xefe Estadu mós sei partisipa iha eventu paralela ne’ebé organiza hosi Millennium Challenge Corporation (MCC) kona-ba investimentu ho impaktu boot. Timor-Leste sai hanesan benefisiáriu ida husi fundu MCC iha loron jullu 2022, ne’ebé Timor-Leste no Estadu Unidu Amérika liuhosi MCCe asina akordu kompaktu. Estadu Unidu fó subvensaun millaun $420 ba Timor-Leste hodi implementa programa rua hanesan tratamentu bee fo’er no drainajen no edukasaun ba edukadór Ensinu Sekundáriu.

Liuhosi eventu paralela sira ne’e, Xefe Estadu sei hala’o reuniaun bilaterál no multilaterál.

Nune’e, Prezidente Repúblika sei finaliza atividade nível a’as iha Nova Iorke iha loron 24 setembru 2023.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!