PNTL submete ona kazu sidadaun ida mate iha karreta ba MP
DILI, 18 setembru 2023 (TATOLI)- Portavós Komandu Jerál Polísia Nasionál Timor-Leste (PNTL), Superintendente Polísia, António da Luz, informa Departamentu Investigasaun Kriminál (DIK) konklui investigasaun no submete ona kazu sidadaun ida mate derrepente iha karreta laran iha otél Rafa iha área Hudi-Laran, suku Bairru Pité, postu Dom Aleixo, Munisípiu Díli.
“Relasiona ho kazu ne’e parte PNTL submete ona ba Ministériu Públiku,” António da Luz hateten, ba jornalista sira iha Komandu Jerál PNTL Caicoli, segunda ne’e.
Kona-ba, motivu sidadaun ne’e nia mate, Portavós PNTL ne’e hateten, ne’e segredu justisa ne’ebé PNTL labele fó sai.
Atu relembra fali katak, sidadaun ida ne’e mate derrepente iha karreta laran, loron segunda (11/9), maizumenus tuku 10:57, dadeer. Maibé, karreta ida para ne’e kontinua moris hela no nain lakonsege hamate karreta ne’e, husik moris de’it to’o lokoraik tuku 14:30 no bainhira seguransa mai haree karreta ne’e moris ema tuur iha laran maibé la book an ka mate ona.
Nune’e, nia bolu sira seluk mai haree hodi loke karreta ne’e, mibé ema ne’ebé lori karreta ne’e iis laiha ona, tanba ne’e seguransa ótel kontaktu kedan ba Polísia to’o kedan lokál krime hodi haree no kontinua halo identifikasaun no invetigasaun hosi submete ba MP atu prosesa tuir lei..
Jornalista: Natalino Costa
Editór : Florencio Miranda Ximenes
