DILI, 20 setembru 2023 (TATOLI) – Ministra Saúde Elia dos Reis Amaral, hala’o enkontru Bilaterál ho Ministru Saúde Cuba José Angel Portal Miranda, iha Nova-Lorke, Estadus Unidus Amérika (EUA) hodi ko’alia kona-ba kooperasaun entre rai rua hodi apoiu nafatin rekursu umanu iha setór saúde.
Ministra Saúde Timor-Leste hato’o agradesimentu kle’an ba Governu Cuba hanesan Nasaun irmaun Timor-Leste nian, ne’ebe hahú apoiu iha setór saúde hafoin enkontru entre Saudozu Prezidente Comandante Fidel Castro ho Maun-Boot Kay Rala Xanana Gusmão (MBKRXG) atuál Primeiru-Ministru (PM) ba Governu Konstitusionál da-sia nian iha Nasaun Malaysia, iha tinan 2007”, dehan iha komunikadu ne’ebé TATOLI asesu, ohin.
Liuhosi koperasaun ne’ebé estabelese entre nasaun rua ne’e konsege prodúz ona médiku jerál hamutuk rihun-ida (1000)-resin ne’ebé gradua ona, nune’e mós sei iha tan médiku espesialista hamutuk na’in rua-nulu-resin-sia (29) daudaun ne’e remata tan ona sira-nia estudu iha área oioin.
MS mós haktuir katak Governu Konstitusionál da-sia sei tau nafatin prioridade atu dezenvolve rekursu umanu liuhusi kooperasaun ho nasaun Cuba iha futuru.
Hanesan nasaun irmaun, Governu Cuba komprimetidu fó apoiu nafatin TL hodi dezenvolve rekursu umanu iha setór saúde inklui área espesializasaun no seluk tan.
Jornalista : Felicidade Ximenes
Editór : Zezito Silva
