MNEK akompaña PR Horta abertura Asembleia Jerál ONU

DILI, 20 setembru 2023 (TATOLI – Ministru Negósiu Estranjeiru no Kooperasaun (MNEK) Bendito dos Santos Freitas akompaña hosi Prezidente Repúblika (PR), José Ramos Horta,  foin lalais ne’e, partisipa iha sesaun abertura Forum Polítika Altu-Nível bá Dezenvolvimentu Sustentável iha Assembleia Jerál Organizasaun Nasaun Unidas (ONU), bá dala-78 iha Nova Yorque.

“Sesaun abertura bá enkontru Altu-Nível ne’ebé hala’o iha sede Nasoens Unidas iha Estadus Unidus Amérika ne’e, partisipa mós husi líder mundiál sira hosi nasaun sira iha mundu”, tenik iha komunikadu ne’ebé Agência TATOLI asesu hosi media MNEK, ohin.

Enkuantu, delegasaun ne’ebé akompaña Xefe Estadu, Ramos Horta hodi partisipa iha Assembleia Jerál ONU ne’e mak Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate-Laek, Embaixadór Timor-Leste bá Nasaun Unidas, Karlito Nunes, Xefe Kaza Sivil Prezidénsia Repúblika, Jesuina Maria Ferreira Gomes, inklui Asesór Servisu Relasaun Internasionál PR, Dionísio Babo Soares.

Entretantu, tuir oráriu, Prezidente Repúblika, José Ramos-Horta, sei hato’o diskursu iha loron 21 fulan Setembru ne’e, iha reuniaun Assembleia Jerál ONU bá dala-78, kona-ba progressu ne’ebé Timor-Leste alkansa ona ligadu ho dezenvolvimentu polítika no ekonómika Timor nian.

Jornalista: Hortencio Sanchez

Editór : Zezito Silva