DILI, 21 setembru 2023 (TATOLI) – Vise-Primeiru Ministru (V-PM) no Primeiru-Ministru (PM) Interinu Mariano Assanami Sabino fó posse ba Daniel Marçal hodi lidera hikas Institutu Nasionál Kombate (INK) HIV-SIDA ba mandatu períodu ida hodi troka Prezidente sesante Atanasio de Jesus.
Tanba ne’e, V-PM husu ba Prezidente foun atu hala’o servisu ho másimu hamutuk ho funsionáriu hotu atu bele halo prevensaun ba moras HIV iha Timor-Leste.
“Ita-boot sira mantein nafatin koordenasaun ho Ministériu Solidaridade, Ministériu Saúde no Ministériu Edukasaun tanba ministériu tolu ne’e iha ligasaun ho servisu Institutu ne’e nian, koordena malu di’ak ho funsionáriu hotu atu halo servisu ne’ebé másimu hodi halo prevensaun ba moras ne’e”, Assanami dehan iha nia intervensaun bainhira fó posse ba Prezidente foun iha Palásiu Governu, kinta ne’e.
Iha okaziaun ne’e, Prezidente foun Daniel Marçal hatete, mandatu ida ne’e mak servisu makas ho parte hotu atu halo prevensaun ba moras HIV-SIDA iha Timor-Leste.
“Prioridade mak oinsa atu halo prevensaun ba moras ne’e, kria estratejia ne’ebé simples para ema bele kompriende, koopera ho instituisaun relevante sira hotu povu hotu atu prevene moras ne’e iha ita-nia nasaun”, Daniel dehan.
Tui nia, ema barak kona moras HIV tanba la iha koñesimentu no barak afeita ba moras ne’e subar aan hodi lakohi hakbesik ba ospitál no klínika sira hodi halo tratamentu.
“Bainhira ita kuandu HIV la’os atu mate, maibé dezafia nafatin ita atu kuidadu nafatin saúde, tanba ita-nia Governu prepara fasilidade, ai-moruk atu proteje nia sidadaun sira, ne’ebé kuandu hetan moras ne’e labele moe ba halo tratamentu hodi hemu ai-moruk”, nia relata.
Tanba ne’e, atu minimiza moras ne’e mak ema hotu tenke iha konsiénsia hodi labele halo relasaun sexuál livre kuandu la’os fen ho laen.
Tuir dadus ne’ebé iha, timoroan kuaze 2,000-resin mak sofre ona ba moras HIV-USIDA.
Rekorda fali katak Daniel Marçal mak lidera lidera antes ne’e, Diresaun HIV-SIDA nudar Sekretáriu Ezekutivu maibé iha VIII Governu Konstitusionál Vise Primeira Ministra Armanda Berta dos Santos aprezenta proposta ezonerasaun liuhosi Konsellu Ministru ba kargu Daniel Marçal.
Maibé iha governasaun da-sia ne’ebé lidera hosi PM Kay Rala Xanana Gusmão nomeia hikas Daniel Marçal hodi lidera fila fali institutu ne’e.
Jornalista: Hortencio Sanchez
Editór : Zezito Silva
