Horta hasoru billionáriu Alexander Soros iha Nova Iorke

DILI, 21 setembru 2023 (TATOLI) –  Prezidente Repúblika José Ramos-Horta hasoru malu ho Prezidente Fundasaun Open Society (OSF), ne’ebé harii hosi magnata negósiu George Soros nia oan mane Alexander Soros iha Nova Iorke.

OSF nu’udar fundadór privadu ida-ne’ebé boot liu iha mundu hosi grupu independente ne’ebé servisu ba justisa, Governasaun demokrátika no direitu umanu hamutuk 12.

OSF hala’o operasaun iha nasaun hamutuk 120-resin iha mundu tomak, uza dotasaun, peskiza, advokasia, investimentu impaktu no investigasaun estratéjika hodi apoia kresimentu demokrasia inkluziva no vibrante sira.

Iha dekade tolu liubá, OSF foka liubá apoiu ema ne’ebé koko atu halo sira-nia komunidade sai justu, livre no armoniozu liu.

“George Soros hanesan billionáriu ida ne’ebé gasta osan lubuk ida hodi ajuda ema barak iha mundu, apoiu liberdade imprensa, apoiu demokrasia iha mundu no sempre apoiu Timor-Leste la’os ho osan maibé ho liafuan, tanba nia ema ida ne’ebé iha influénsia boot iha Amérika”, tenik Prezidente Repúblika Horta liuhosi komunikadu ne’ebé Agência TATOLI asesu hosi Media Gabinete Prezidensia Repúblika (GPR), ohin.

Alexander Soros, ne’ebé moris iha tinan 1985, nu’udar filantropista amerikanu no bilináriu George Soros nia oan-mane.

Nia nu’udar prezidente husi Fundasaun Open Society no hetan rekoñesimentu hanesan Lider Global Joven sira husi forum ekonomiku mundiál 2018.

Alexander jere Fundasaun Família Soros no Fundasaun Sosiedade Open, ne’ebé fahe maizumenus dolar amerikanu millaun US$1.5 kada tinan, hodi promove direitu umanu no Governu demokrátiku.

Jornalista: Hortencio Sanchez

Editór : Zezito Silva