DILI, 21 stembru 2023 (TATOLI) – Komandante Unidade Polísia Marítima (UPM) Superintendente Polísia Eugenio Pereira, informa hahú hosi janeiru to’o setembru, servisu UPM konsege rejista kazu ilísitu kontra bandu hamutuk neen iha tasi fronteira oeste nian.
“Durante tinan 2023 ne’e, ita rejista kazu ilísitu hamutuk neen no ita entrega kedan ba Komandu Polísia Nasionál Timor-Leste (PNTL) Bobonaro hodi submete ba prosesu investigasaun no hato’o ba Ministériu Públiku”, dehan Komandante ne’e ba Agência TATOLI iha Faról Dili, kinta ne’e.
Sasan hirak ne’ebé UPM preende iha tasi fronteira Timor-Leste no Indonezia mak sigaru, animál fahi, minarai, motor no seluk tan no prosesu hotu entrega ba Komandu PNTL Bobonaro.
Iha tinan sira ba kotuk, UPM preende sasan hanesan motor ne’ebé hatama hosi Indonézia liuhosi tasi fronteira Mota Masin Covalima, prosesu hotu entrega ona ba Komandu PNTL Covalima.
Enkuantu iha tasi Baucau nian, UPM konsege kaptura sidadaun Indonézia sira halo peska ilegál utiliza bomba lakrimojeniu hodi hamate ikan iha tasi laran.
Ho nune’e, UPM halo identifikasaun ho submete ba Komandu PNTL Baucau.
Nia dehan, daudaun ne’e, UPM nia membru sei menus liu ho nune’e utiliza de’it alternativu seluk hodi koopera hamutuk ho Unidade Patrollamentu Fronteira (UPF), FALINTIL Forsa Defeza Timor-Leste (F-FDTL) Komponente Navál hodi halo servisu.
“Ami koopera mós ho parte UPF no Komponente Navál hodi halo servisu ne’ebé másimu kontrola iha tasi no liña fronteira sira ho rekursu ne’ebé menus liu entaun ami utiliza ita-nia komunidade peskadór sira atu identifika ró ilegal sira no ami-nia servisu informasaun mós másimu tebes”, nia relata.
Dadaun ne’e, UPM iha Postu hamutuk 12 mak harii iha teritóriu nasionál hodi halo kontrolu másimu ba tasi no peska ilegál, kontrola tranzasaun ilegál sira iha tasi laran.
Jornalista: Hortencio Sanchez
Editór : Zezito Silva
