MS sei kontrata médiku jerál 63 destaka ba postu saúde iha TL
DILI, 21 setembru 2023 (TATOLI) – Diretór Jerál Servisu Koorporativu iha Ministériu Saúde, Marcelo Amaral, dehan Ministériu Saúde iha tempu badak sei kontarta médiku jerál hamutuk 63 hodi apoiu servisu atendimentu iha postu saúde sira iha teritóriu nasionál.
“Ami planu ona atu kontratu médiku jerál sira hamutuk 63 ne’ebé uluk servisu ona iha internamentu nian, entaun ida ne’e mak ita atu bolu fila fali sira mai para bele kontrata hodi haruka fali ba área sira ne’ebé médiku jerál sira la iha ne’e”, Marcelo Amaral informa ba TATOLI iha nia kna’ar fatin MS Caicoli, ohin.
Nia hateten, médiku jerál sira iha munisípiu mai hotu iha Hospitál Nasionál Guido Valadares (HNGV) ho total 87, tanba HNGV halo rekrutamentu interna ida ho intensaun katak médiku sira ne’ebé mak iha ona esperiénsia kona-ba klínika dada hotu mai iha nasionál no insentiva katak ba médiku sira ne’ebé mak servisu iha área rurál kleur ona.
“Médiku Jerál sira ne’ebé agora daudaun mai hotu iha HNGV sira halo rekrutamentu interna ida ho intensaun katak médiku sira ne’ebé mak iha ona esperiénsia kona-ba klínika, ita dada mai iha HNGV no insentiva ba médiku sira ne’ebé mak servisu iha área rurál kleur ona. Atu nune’e sira iha oportunidade para bele mós aplika mai iha HNGV sira bele mellora di’ak liután sira-nia kapasidade klíniku nian”, nia esplika.
Nia dehan, postu saúde sira iha teritóriu nasionál mak profisionál saúde la iha, MS tau ona iha planeamentu no orsamenta ona.
“Ita propoin osan ba Governu, espera aprova atu ita bele mantein numeru pesoál saúde iha área rurál ne’eba, portantu Governu Konstituisionál ninia kompromisiu polítiku mós garante katak pesoál saúde sira labele halimar de’it, maibé presiza servisu atu nune’e bele servi povu ho di’ak”, nia subliña.
Iha sorin seluk, SABEH husu ba Ministériu Saúde atu kontinua mellora rekursu umanus ba postu saúde sira iha área rurál atu nune’e fó atendimentu ne’ebé di’ak ba populasaun.
“Husu ba Governu atu ba oin oinsá atu fahe rekursu sira ba iha fatin sira ne’ebé mak to’o oras ne’e seidauk kompleta rekursu umanu, nune’e bele fó atendementu saúde ne’ebé di’ak no kualidade ba komunidade sira iha área rurál”, Diretór Ezekutivu Organizasaun Voluntáriu Saúde Ba Ema Hotu (SABEH), Andre Belo konklui.
Jornalista : Felicidade Ximenes
Editór : Zezito Silva
