UN mantein apoiu dezenvolvimentu TL

DILI, 21 setembru 2023 (TATOLI) – Reprezentante Nasaun Unidas (UN) iha Timor-Leste Funmi Balogun, dehan apoiu nafatin Timor-Leste atu bele alkansa dezenvolvimentu sustentavél.

“Hasoru malu ho Vise Primeiru Ministru Mariano Assanami Sabino atu ko’alia ami-nia pozisaun hodi apoiu nafatin Governu ho povu Timor-Leste oinsa bele alkansa dezenvolvimentu sustentavál”, Funmi dehan ba jornalista-sira iha Palásiu Governu hafoin remata reuniaun ho Assanami, kinta ne’e.

Nia dehan, UN apoiu Timor-Leste la’os buat foun maibé kontinua reforsa de’it saida mak Goveru halo ona.

“Ami nia apoiu la ses hosi saida mak Governu halo ona, ko’alia ho Vise-Primeiru Ministru foka liubá asuntu dezenvolvimentu rurál no dada bee-moos ba komunidade sira, ida ne’e mak ami sei apoiu”, nia afirma.

Durante ne’e, UN apoiu makas Governu Timor-Leste iha área sistema saúde nian, nutrisaun, merenda eskolar no seluk tan.

Jornalista: Hortencio Sanchez

Editór : Zezito Silva