Xefe Estadu hasoru malu ho Diretora-Jerál MCC
DILI, 21 setembru 2023 (TATOLI) – Prezidente Repúblika Timor-Leste, José Ramos-Horta, hasoru malu ho Diretora-Jeral Millennium Challenge Corporation (MCC), Alice Albright diskute kona-ba akordu entre Timor-Leste no MCC hodi selebra ona iha tinan 2016.
Sorumutu ne’e hala’o iha okaziaun partisipasaun Prezidente Ramos Horta iha sesaun Asembleia Jerál Nasaun Unidas bad ala-78, ne’ebé hala’o iha Nova Iorke.
“Durante enkontru ne’e ko’alia liu kona-ba MCC nia ajudu millaun $450 ba Timor-Leste, ne’ebé asina ona iha 2016”, tenik iha komunikadu ne’ebé Agência TATOLI asesu hosi media Gabinete Prezidénsia Repúblika (GPR), ohin.
Kompaktu ne’e dezeña atu apoia prioridade dezenvolvimentu Timor-Leste nian, inklui hadia infraestrutura, hametin governasaun no promove kresimentu ekonómiku.
Horta hato’o nia apresiasaun ba MCC nia apoiu no reforsa kompromisu Timor-Leste nian atu implementa kompaktu ne’e.
Albright kongratula Timor-Leste ba progresu iha implementasaun kompaktu ne’e no hato’o nia konfiansa katak Timor-Leste sei kontinua atinje ninia objetivu dezenvolvimentu.
Jornalista: Hortencio Sanchez
Editór : Zezito Silva
