iklan

EDUKASAUN, HEADLINE

Fundasaun Alola prevee millaun $50 ba implementasaun programa iha tinan oin

Fundasaun Alola prevee millaun $50 ba implementasaun programa iha tinan oin

Diretóra-Ezekutiva Fundasaun Alola, Maria Imaculada Guterres. Imajen Tatoli/ Egas Cristovão

DILI, 22 setembru 2023 (TATOLI) – Fundasaun Alola ne’ebé sai parseiru di’ak ba Ministériu Edukasaun (ME) prevee millaun $50 atu realiza programa haat iha 2024 mak hanesan Pré-Eskolár Komunitária, Programa Alma, Bolsa Estudu no Biblioteka Hale’u.

Diretora Fundasaun Alola, Maria Imaculada Guterres, hatete programa haat ne’ebé fundasaun trasa ne’e  atu reforsa tan programa sira ne’ebé maka kria antes.

“Fundasaun Alola mai halo audénsia ho Ministra Edukasaun atu aprezenta programa edukasaun ba tinan oin. Programa ne’ebé ami lori mai ne’e kuaze programa anteriór nian ne’ebé ami kontinua trasa fali ba tinan oin”, dirijente ne’e afirma hafoin aprezenta planu iha Ministériu Edukasaun atu hetan apresiasaun molok implementa, iha Vila Verde, ohin.

Programa haat ne’ebé Fundasaun kontinua tau ba tinan oin ne’e konsidera importante tebes tanba Alola iha interese boot atu dezenvolve edukasaun ba labarik sira iha Timor-Leste. Husi Programa Pré-Eskolár Komunidade ne’e rasik sei disponibiliza formasaun ba manorin sira hodi hasa’e sira-nian kapasidade hodi tulun labarik sira. Formasaun ne’e rasik realiza tanba hetan apoiu husi Institutu Nasionál Formasaun Dosente no Profisionál Edukasaun (INFORDEPE).

Programa Alola nian ne’e hetan apresiasaun husi Ministra Edukasaun, Dulce de Jesus. Governante ne’e husu ba Fundasaun atu kontinua serbisu hamutuk hodi lori edukasaun Timor-Leste iha tinan lima tuirmai ho di’ak liután.

Dulce de Jesus agradese ba Fundasaun ne’ebé reforsa ona sira-nian hanoin di’ak hakarak kontinua apoia Ministériu Edukasaun, liuliu halo intervensaun iha pré-eskolár komunitária. Programa ne’ebé maka Alola halo ne’e di’ak tebes tanba bele hasa’e ona taxa kobertura iha pré-eskolár.

“Sira serbisu hamutuk hahú husi 2001 to’o ohin loron. Agora, sira kontinua ho konseitu ida ho Programa Pré-Eskolár Komunitária ne’e buat ida di’ak tebes”, relembra.

Governante ne’e salienta katak Programa Pré-Eskolár ne’ebé maka Governu kria ne’e to’o agora la to’o atu kobre labarik nia partisipasaun. Tanba dadus ne’ebé ministériu hatudu katak taxa partisipasaun labarik husi idade entre 3 no 5 foin maka atinje 27% de’it. Tanba ne’e, liuhusi Fundasaun Alola nia apoia hodi kria tan Programa Pré-Eskolár Komunitária ne’e bele ajuda hasa’e liután taxa partisipasaun labarik sira-nian.

Notísia relevante: Fundasaun Alola fó bolsa estudu ba vítima Alola nia oan

Jornalista: Tomé Amado

Editora: Maria Auxiliadora    

iklan
iklan

Leave a Reply

iklan
error: Content is protected !!