Top

Funsionáriu APC 30 konklui treinamentu asisténsia salvamentu ba ema

Diretór Komandu Nasionál Bombeiru Timor-Leste, Claudio da Silva. Imajen/Osória A.Marques

DILI, 22 setembru 2023 (TATOLI) – Funsionáriu Autoridade Protesaun Sivil (APC, sigla portugés) na’in-30 konklui ona formasaun liuliu iha área asisténsia salvamentu bainhira ema hetan dezastre iha mota, lagoa no tasi-laran.

Diretór Sentru Formasaun APC, Claudio da Silva, sente kontente tanba liuhosi parseiru Mercy Corps ho APC atu bele apoia APC hodi fó oportunidade ba funsionáriu APC hodi tuir treinamentu kona-ba fó asisténsia ba ema nomeadamente oinsa atu halo salvamentu ba sidadaun sira iha tempu dezastre.

Nia dehan, antes ne’e APC ho parseiru Mercy Corps fasilita ona trimanentu ba funsionáriu APC nain-30 iha área salvamentu nian no tinan ida ne’e kontinua formasaun hanesan ho ema nain-30, ho objetivu atu hahú prepara rekursu hodi antesipa dezastre ruma mosu, rekursu hirak ne’e bele fó asisténsia ba sidadaun sira.

“Ita nia papél ne’e oinsá atu fó asisténsia umanitaria ba ita-nia sidadaun sira bainhira iha perigu nian-laran hanesan fó asisténsia salvamentu no primeiru sokoru ba ita-nia sidadaun sira, bainhira mosu dezastre naturál”, Diretór Sentru Formasaun APC, Claudio da Silva, iha nia intervensaun enseramentu iha treinamentu ba funsionáriu iha Otel Arbiro Beach, sesta ne’e.

Nia agradese ba parseiru Mercy Corps ne’ebé fó apoiu ba APC hodi realiza formasaun ne’e, nune’e bele hasae koñesimentu no kapasidade funsionáriu APC oinsá prepara aan hodi fó asisténsia ba sidadaun sira bainhira iha perigu nia-laran.

Claudio espera katak treinamentu sira hanesan ne’e bele kontinua ba faze sira tuir mai atu nune’e, APC bele prepara nia rekursu di’ak liután iha área salvamentu nian.

Diretór husu ba funsionáriu APC ne’ebé hetan ona treinamentu atu bele tau iha prátika hodi fó asisténsia ba sidadaun sira.

Iha fatin hanesan, Instrutór hosi Dremers Dive Academy, Luis Melki Bere Uno, sente tanba bele fó formasaun ba funsionáriu APC nian iha área salvamentu.

Iha fatin hanesan, reprezentante Mercy Corps, Samecer Karki, hateten APC ho Mercy Corps hanesan parseria ne’ebé di’ak liuhosi programa formasaun dala rua ona ba funsionáriu APC hodi fó asisténsia ba sidadaun sira iha kazu inudasaun, tsunami, primeiru sukoru.

Nia dehan, parseiru sira hanesan KOICA, Mercy Corps no APC estabelse ona Komisaun Jestaun dezastre iha suku vunerabilidade 15 iha Díli.

Jornalista : Natalino Costa

Editór : Zezito Silva

Publisidade

Leave a Reply

Latest Post

error: Content is protected !!