Grupu ualu hosi Da-Udu vizita fatin hakiak ikan no manu iha Daitete

MALIANA, 22 setembru 2023 (TATOLI) – Konsellu Nasionál Seguransa Alimentár no Nutrisaun (KONSANTIL), sesta ne’e lori grupu ualu hosi suku Daudu, postu administrativu Cailaco, vizita fatin hakiak ikan no manu iha aldeia Daitete, suku Ritabou, postu administrativu Maliana, munisípiu Bobonaro.

Grupu hakiak hirak-ne’e mai hosi setór tolu, komposta hosi ortikultura hakiak grupu tolu, pakuária hakiak manu lokál haat no peska hakiak ikan ida-ne’ebé hetan apoia hosi Organizasaun ba Alimentasaun no Agrikultura (FAO, sigla inglés).

Diretór Seguransa Alimentár Munisípiu Bobonaro, António Maia, hateten  objetivu hosi vizita ne’e atu grupu sira bele hetan esperiénsia hosi Armindo da Cruz hanesan hakiak ikan no manu ho osan, forsa no kreatividade rasik.

Hafoin establese grupu hirak-ne’e, iha fulan tolu liubá, maibé membru sira seidauk iha esperiénsia másimu atu dezenvolve sira-nia atividade.

“Ha’u lori grupu sira-ne’e mai, atu individu ne’e bele fó motivasaun ba sira, hodi halo tuir kreatividade individu nian, atu nune’e ita-nia grupu sira fila bele iha ona hanoin hodi dezenvolve sira-nia grupu, atubele hetan rendimentu sustenta sira-nia família, liuliu hadi’ak sira-nia hahán ho kualidade no nutritive,” nia informa ba jornalista sira hafoin vizita.

Reprezentante Prezidente Autoridade Munisípiu Bobonaro, Gisela Pires, husu grupu sira atu banati tuir esforsu ne’ebé Armindo halo, tanba nia dezenvolve atividade mesak sein apoia hosi ajénsia no governu.

Atuál Diretór Apoia Oraganizasaun Naun-Governamentál (ONG) Lokál no Komunitária ne’e konsidera sidadaun refere sai ezemplár ba hakiak-na’in sira iha Bobonaro.

“Ita apresia no orgulu ho ita-nia sidadaun ida-ne’ebé mak iha duni esforsu no votande rasik, hodi bele kria kampu trabalhu rasik ba nia-aan, hodi haforsa ekonomia família uma-laran,” nia dehan.

Membru Grupu Biadero, Angela Mais, sente kontente tanba liuhosi vizita ne’e bele hetan motivasaun no aprende buat balu.

“Ami mai iha-ne’e bele komprende liután, kona-ba hakiak ikan no manu, depois ami fila ba ami-nia suku bele halo tuir saida mak tiu Armindo halo,” nia katak.

Enkuantu Armindo da Cruz hahú hakiak ikan tipu Nila, Lele-Zumbo no ikan Mas, hahú  iha tinan 2016 to’o ohin loron konsege fa’an ikan fini ba komunidade sira no grupu balu.

Jornalista   : Sérgio da Cruz

Editór          : Evaristo Soares Martins