Médiku hosi Austrália halo tratamentu saúde iha klínika veteranu Baucau
BAUCAU, 22 setembru 2023 (TATOLI) – Médiku espesialista hosi Austrália sesta ne’e, hala’o atendementu saúde ba veteranu inklui komunidade iha klínika David Alex Daitula Baucau.
Sekretáriu Jerál Konsellu Munisipál Kombantente Libertasaun Nasionál (CMCLN, sigla portugés), Manuel ‘Alari’ da Costa Soares, esplika, atividade refere realiza bainhira serbisu hamutuk entre veteranu Austrália ho Timor-Leste liuliu halo tratamentu dahuluk ba kondisaun veteranu sira iha Baucau.
“Ita-nia esperansa liuhosi atividade ne’e bele deskobre problema sira relasiona ho saúde nune’e fó solusaun ba veteranu sira iha Baucau,” Sekretáriu Jerál CMCLN Baucau hateten iha Vila Antiga, sesta ne’e.
Ho prezensa médiku estranjeiru hanesan parte kooperasaun entre nasaun rua liuliu bele ajuda rezolve kazu moras ne’ebé veteranu sira hasoru durante luta kontra okupasaun Indonézia.
Atividade konsulta jerál refere hala’o durante loron-ida hodi deteta no fó atendimentu dahuluk hanesan ai-moruk no tuir planu iha tinan-2024 sei kontinua ba pasiente sira-ne’ebé hala’o ona diagnóstika hanesan operasaun.
“Sira sei dekobre liuhosi konsulta ne’e nune’e sai dadus tanba sei kontinua iha tinan oin,” Alari akresenta.
Ekipa refere sei halo mós observasaun ba fasilidade klínika Daitula hanesan infraestrutura inklui ekipamentu antes CMCLN prepara proposta hodi hetan fundu ba klínika Veteranu Baucau.
Veteranu Tomás Ximenes Gama ‘Maugadi’, sente kontente ho prezensa médiku hosi Australia tanba bele ajuda ona probelema saúde ne’ebé veteranu sira hasoru durante sei moris no husu atu atividade ne’e rútina nafatin.
“Ami-nia hakarak sira mai tán nune’e bele halo konsulta ba veteranu sira,” Maugadi hateten.
Ekipa médiku hamutuk ho veteranu Austrália hamutuk na’in-25 mak prezensa iha klínika Daitula komposta hosi doutór espesialista na’in-rua hanesan internista, médiku na’in-haat, enfermeiru no restu voluntáriu hosi sívil no militár.
Jornalista : Natalino Belo
Editór : Evaristo Soares Martins
