MNEK ho MS ezonera adidu Saúde iha Bali
DILI, 22 setembru 2023 (TATOLI) – Ministru Negósiu Estranjeiru no Kooperasaun (MNEK), Bendito Freitas ho Ministra Saúde ezonera adidu Saúde iha Bali, Repúbika Indonézia.
Tuir nota ne’ebé TATOLI asesu iha Jornál Repúblika, MNEK no Ministra Saúde ezonera Pedro Canisio da Costa Amaral ne’ebé hanesan tékniku superiór Grau B no kargu hanesan adidu saúde no servisu iha MNEK iha Bali.
Desizaun ida ne’e ho baze ba alinea d númeru 1 artigu 17, relasiona ho alinea b númeru 1 artigu 20 entre Dekretu Lei Númeru 46/2023 28 jullu.
Hafoin ezonera, Ministru MNEK ho Minstra Saúde nomea fali Graciano da Costa Cruz atu ezerse nia funsaun hanesan adidu saúde iha Bali.
Adidu saúde nia responsabilidade mantein no atualiza informasaun sira iha ospitál ba kada pasiente, kona-ba prosesu diagnóstiku, halo ezamizasaun, terapia no tratamentu ne’ebé halo husi médiku sira iha Bali ba pasiente no família sira.
Vizita regularmente ba pasiente sira no partisipa enkontru, halo koordenasaun ho reprezentante servisu ospitalár sira iha unidade saúde Repúblika Indonezia, halo justifikasaun no rekolla dadus kona-ba atendimentu sira ne’ebé mak profisionál saúde sira halo ba pasiente no família sira.
Jornalista : Felicidade Ximenes
Editór : Zezito Silva
