Mundialmente fó solidaridade ba Rohingya iha Myanmar
DILI, 22 setembru 2023 (TATOLI) – Lider internasionál sira hala’o konferénsia iha sede Organizasaun Nasaun Unidas (ONU) hodi dehan: “Ita haluha ona ami ka” ho objetivu atu fó solidaridade globál ba grupu Rohingya ne’ebé hetan terus hosi junta militar iha Myanmar.
Iha atividade partisipa mós hosi Xefe Estadu Timor-Leste José Ramos-Horta hodi fó solidaridade ba grupu minoria iha Myanmar ne’e.
“Konferénsia ne’e hala’o diskusaun kona-ba buka solusaun ba krize ne’e, fornese asisténsia umanitária no fó justisa ba vítima sira”, tenik Prezidente Horta iha komunikadu ne’ebé Agência TATOLI asesu hosi Media Gabinete Prezidensia Repúblika (GPR), ohin.
Horta subliña importánsia hosi prinsípiu solidariedade globál no direitu umanu hodi rezolve krize Rohingya. Konkluzaun hosi konferénsia ne’e haree ona kompromisu foun ida atu apoia komunidade Rohingya no asegura katak sira-nia susar nafatin sai nu’udar prioridade globál.
Jornalista: Hortencio Sanchez
Editór : Zezito Silva
