DILI, 22 setembru 2023 (TATOLI) – Komandante Unidade Polísia Marítima (UPM) Superintendente Polísia Eugenio Pereira, dehan iha ró rua ne’ebé mak durante ne’e avaria, maibé Ró Kay Rala iha faze manutensaun no Ró Lusitania mak sei avaria no hein Orsamentu Jerál Estadu 2024.
“Ita iha ró ne’ebé nia medida bele dehan iha kondisaun atu halo patrollamentu iha tasi maibé agora avaria hela, hanesan ró Kay Rala no Lusitania, agora daudaun ró Kay Rala mak halo ona manutensaun tanba iha tinan 2023 Governu aloka orsamentu hodi halo manutensaun ba ró ne’e”, Komandante dehan ba Agência TATOLI iha Faról, foin lalais ne’e.
Enkuantu, kona-ba ró Lusitania, Komandu Polísia Nasionál Timor-Leste (PNTL) liuhosi UPM halo ona planu atu husu Orsamentu Jerál Estadu (OJE) 2024 bele prevé hodi halo mós manutensaun atu fasilita servisu UPM nian.
Tuir nia, UPM dadaun ne’e, iha de’it ró speed boat hamutuk tolu, ida koloka ba parte fronteira, rua koloka iha Kuartél Jeral UPM Dili hodi halo patrollamentu iha tasi no ida koloka permanente iha tasi laran atu halo salvamentu ba komunidade sira ne’ebé hetan dezastre iha tasi laran.
Postu UPM ne’ebé koloka iha teritóriu nasionál hamutuk 12 ho membru ativu hamutuk 180. Tanba ne’e komandante ne’e rekomenda ba Governu atu tinan oin bele loke tan rekrutamentu ba PNTL foun hodi koloka ba UPM hodi bele aumenta tan rekursu hodi servisu iha tasi.
“Agora daudaun ita-nia rekursu menus liu, ita presiza tan membru hamutuk 700, atu bele kobre hotu ona iha postu 12 ne’e tanba ita iha planu atu aumenta tan postu haat liuliu iha parte kosta súl nian, tanba agora membru ativu ne’e 180 de’it ne’e la suvisiente ba ami, maibé ami tenta atu jere hodi halo servisu ne’ebé másimu”, nia konklui.
Jornalista: Hortencio Sanchez
Editór : Zezito Silva
