iklan

INTERNASIONÁL, DILI, HEADLINE, SAÚDE

Ministra Elia partisipa atividade OMS iha EUA

Ministra Elia partisipa atividade OMS iha EUA

DILI, 23 setembru 2023 (TATOLI) – Ministra Saúde (MS) Elia dos Reis Amaral, hamutuk ho Prezidente Repúblika (PR), José Ramos Horta no mós delegasaun Timor-Leste Partisipa iha eventu ne’ebé organiza hosi Diretór Jerál Organizasaun Mundiál Saúde (OMS) Tedros Adhanam  Ghebreyesus, iha Nova-Iorke, Estadus Unidus Amérika (EUA).

“Objetivu hosi eventu ne’e mak atu haree kona-ba nasaun sira iha (South-East Asia Region WHO-SEARO Sigla Inglés), nasaun sira iha Sudeste Asiátiku nia planu, programa no polítika inklui kompromisu sira iha 2030 mai”, tenik iha komunikadu ne’ebé Agência TATOLI asesu, ohin.

Iha okaziaun ne’e, Ministra Elia hato’o progresu servisu setór saúde iha Timor-Leste, dezafiu ne’ebé hasoru no oinsá tau prioridade intervensaun inklui prioridade haforsa servisu prestasaun saúde ne’ebé kualidade ba populasaun iha futuru liuhosi programa integradu servisu saúde nian.

Nia hato’ o mós esperiénsia kona-ba vizaun servisu iha globál no nasionál hodi luta kontra moras hada’et no la hada’et no oinsá bele servisu hamutuk entre nasaun hotu iha futuru, inklui tau prioridade alokasaun fundu husi doméstika no parseiru sira.

Elia hato’o agradesimentu ba OMS ne’ebé sempre hamutuk no apoiu MS iha área tékniku no fundu sira liuliu durante períodu pandemia Covid-19.

Ministra husu apoiu ba OMS, ba eliminasaun moras malaria iha Timor-Leste ba 2023, inklui moras trópiku sira seluk, liuliu dengue ne’ebé nafatin sai ameasa ba Timor-Leste.

Governante ne’e mós husu ba OMS atu mantein apoiu ba dezenvolvementu rekursu umanu iha setór saúde.

“WHO-OMS kompromisu bo’ot atu apoiu TL hodi prosesa eliminasaun ba moras malária iha TL liuhosi apoiu ekipa tékniku sei apoiu mós ba servisu prestasaun kuidadu saude primária (KSP), sekundária no tersiária, inklui apoiu dezenvolve kapasidade profesionál saúde no área prioridade saúde seluk iha TL ba futuru”, tenik DJ OMS.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!