Universidade Zhejiang Gongshang hakarak koopera ho TL
DILI, 23 setembru 2023 (TATOLI) – Primeiru-Ministru, Kay Rala Xanana Gusmão, hala’o vizita ba Universidade Zhejiang Gongshan Hangzhou Provínsia Zheuhiang- Xina.
Vizita Xefe Governu, simu direta hosi Magnífiku Universidade Zhejianf Gongshan, Wang Yonggui ho ekipa dosente no estudante sira hodi kontinua realiza kedas enkontru kooperasaun.
Universidade Zhejianf Gongshan nu’udar universidade ida ne’ebé hosi Estadu Xina nian, iha ne’ebé tama kategoria di’ak iha ninia regra no sistema edukasaun ne’ebé hetan reputasaun prestíjiu ka sistema edukasaun di’ak.
Magnífiku Universidade Zhejiang Gongshan Universrsity, Wang Yonggui informa ba Primeiru-Ministru Xanana katak hakarak estabelese kooperasaun bilaterál ho Governu Timor-Leste hodi apoia iha setór edukasaun, liuliu área siénsia umana no setór prioridade seluk tan.
Primeiru-Ministru Kay Rala Xanana Gusmão agradese hodi informa katak Governu Timor-Leste liuhosi Ministériu Edukasaun kria kooperasaun ho universidade privadu no institutu públiku iha Timor-Leste atu hadia kualidade edukasaun ensinu superiór sira hodi investe makas iha rekursu umanu ne’ebé kualifikadu, profisionál, disiplina atu prodús rekursu di’ak ba foin sa’e timoroan sira.
Nune’e, ho vizita ba Universrsity Hangzhou Provínsia Zheuhiang- Xina pertinente hodi estabelese kooperasaun iha futuru.
Governu agradese kompromisu hosi Zhejianf Gongshan Universrsity hakarak estabelese kooperasaun ho Governu Timor-Leste.
“Ami agradese ba imi-nia apoiu atu ajuda ami iha setór edukasaun, ami fiar katak ho apoiu ne’e sei hametin liután lasu kooperasaun entre Xina no Timor-Leste”, PM Xanana dehan liu hosi komunikadu ne’ebé Agência TATOLI asesu, ohin.
Iha oportunidade ne’e, Xanana hato’o palestra sientífiku ba estudante sira ho tema “A Mudança da Forma da Àsia: da Xina a Timor-Leste” hodi motiva estudante foinsa’e sira iha Xina inklui mós Timor-Leste bele prepara futuru atu sai ema ida di’ak ba sira-nia futuru no nasaun.
Xanana apresia durante independénsia, Xina sai nu’udar parseiru estratéjiku ne’ebé ajuda finansia dezenvolvimentu infraestrutura no apoia Timor-Leste hola sai membru plenu Asosiasaun Nasoins Sudeste Aziátiku (ASEAN).
Iha fatin hanesan, Magnífiku Universidade Zhejiang Gongshan Universrsity, Wang Yonggui agradese no konsidera vizita Xefe Governu ba sira-nia fatin nu’udar momentu istóriku hodi aproveita partisipa iha ASIAN Games 2023 ba dala-19 bele vizita no hato’o palestra sientífiku ba estudante no dosente sira.
“Universidade Zhejiang Gongshan hakarak estabelese kooperasaun ho Governu Timor-Leste iha setór edukasaun, ami hakarak koopera iha área siénsia umana hodi reforsa edukasaun sai nu’udar pilar importante ida ba dezenvolvimentu Timor-Leste nian”, Reitór Wang Yonggui informa.
Nia dehan, Xina no Timor-Leste estabelese ona kooperasaun bilaterál entre Estadu rua no presiza fortifika liután lasu kooperasaun entre universidade Xina no universidade sira iha Timor-Leste inklui mós Governu Timor-Leste bele haruka estudante sira hala’o vizita interkámbiu entre estudante hodi fahe esperiénsia ba malu.
“Iha tinan 20 ne’e, estabelese ona relasaun diplomátika entre Xina no Timor-Leste, nu’udar kooperasaun prátika ida entre nasaun rua hodi halais dezenvolvimentu ne’ebé sei fó benefisiu ba rai rua”, nia hatete.
Reitór ne’e reforsa tan diskursu sientífiku Primeiru-Ministru Xanana ho “A Mudança da Forma da Àsia: da Xina a Timor-Leste” ne’ebé aprezenta, importante hodi inspira no motiva professór no alunu sira hodi entende no komprende vizaun Timor-Leste no Xina liga ba iha kontestu ASIAN.
Vizita Xefe Governu akompaña direta hosi Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Administrasaun Estatal, Tomás do Rosario Cabral, Ministru Planeamentu Investimentu Estratéjiku, Gastão de Sousa, Ministru Juventude Desportu Arte no Kultura, Nelio Issac Sarmento.
Enkontru ne’e, iha mós serimónia entrega prendas tais Timor no kafe Timor-Leste hosi Xefe Governu ba Magnífiku Reitór,Wang Yonggui nu’udar sinál agradesimentu.
Jornalista: Hortencio Sanchez
Editór : Zezito Silva
