DILI, 24 setembru 2023 (TATOLI) – Komandante Jerál Polísia Nasionál Timor-Leste (PNTL) Komisáriu Jerál Polísia Henrique da Costa, dehan atu garante seguransa interna presiza iha tan rekrutamentu ba membru polísia foun iha 2024.
‘’Rekomenda ba Governu atu tinan 24 tenke tau prioridade ba rekursu PNTL katak tenke rekruta membru polísia foun’’, nia revela iha ámbitu diskusaun kona-ba seguransa nasionál ne’ebé hala’o iha salaun CNE, Colmera, segunda ne’e.
“Ita nia metas ka metas PNTL ne’e, se bele ita tinan-tinan tenke halo rekrutamentu ba membru PNTL na’in 500 ho nune’e to’o 2028 hodi presta servisu ne’ebé di’ak ,” Komansante Jerál PNTL Henrique da Costa.
“Ohin ne’e, ita aprezenta ba Ministru Interiór katak Governu tenke halo rekrutamentu ba membru PNTL”, nia dehan.
Nia adianta, kuandu tinan oin mak la iha rekrutamentu ba membru PNTL foun, ida ne’e susar ba institusaun PNTL atu atinje metas ba seguransa nasionál, tanba PNTL kompromete atu kualker krime ne’ebé akontese iha ne’ebé de’it.
“Kuandu tinan oin mak ita la iha rekurutamentu ba membru PNTL foun mak ita ba halo atendimentu ba kriminozu sira ne’e, sira fila atende fali ita, tanba ita polísia ne’ebé mak idade barak mak avansadu, sira nia forsa mós la iha ona atu hasoru ita-nia kriminozu sira, ita sei lakon ho kriminozu sira bainhira halo atuasaun”, nia afirma.
Ministru Interiór, Francisco Guterres, hateten MI sei konsolida seguransa interna hanesan Polísia Nasionál Timor-Leste hodi asegura estabilidade nasionál hodi garantia hakmatek ba sidadaun sira.
Timor-Leste, atualmente ho totál membru PNTL 4.376 ne’ebé fó garantia ba seguransa nasionál
Jornalista: Natalino Costa
Editór : Zezito Silva
