HNGV rejista pasiente foun fase ran 13

DILI, 25 setembru 2023 (TATOLI) – Espesialista Neofrolojia iha Hospitál Nasionál Guido Valadares (HNGV), Gustavo do Rosario da Cruz, informa durante fulan agostu no setembru, rejista pasiente foun fase ran iha Hospitál Nasionál Guido Valadares hamutuk 13.

“Iha fulan agostu kazu foun na’in-hitu ne’ebé fase ran iha ne’e depois setembru hamutuk na’in-neen, hamutuk 13”, Gustavo do Rosario da Cruz, dehan iha nia kna’ar fatin HNGV, ohin.

Nia dehan, totál kazu ne’ebé mak rejistu desde hemodialise, dezde 2012 hamutuk 112. Husi kazu sira ne’e, médiku sira fahe ba programasaun hanesan pasiente balun semana ida dala rua no balun semana ida dala tolu tuir moras ne’ebé mak iha.

“Husi kazu ne’e, sira ne’ebé mak tuir programa tiha ona ne’e, pasiente sira ne’e balun semana ida fase ran dala rua no balun fase ran semana ida dala tolu, entaun ida ne’e mak durante ami halo”, nia dehan.

Nia afirma, diferénsia entre semana ida dala rua no dala tolu ne’e, depende ba pasiente nia kondisaun, tanba ne’e mak médiku sira fó semana ida dala rua no dala tolu.

“Pasiente sira ne’e, balun mai tratamentu tiha ne’e depois sira hakarak fila ba uma hodi uza tradisionál depois ida ne’e sira hakarak mai fila fali iha ne’e hodi hetan tratamentu kontinuasaun husi médiku sira”, nia informa.

Nia esplika, totál pasiente ne’ebé lakon ona vida, hahú husi janeiru to’o setembru tinan ida ne’e hamutuk 10-resin tanba ho kazu komplikasaun  sira ne’ebé pasiente sira iha.

Iha sorin seluk, pasiente Octavio dos Santos, hahú fase ran ho idade tinan 17, fase ran semana ida dala tolu no iha maluk balun fase ran tinan 15 to’o tinan 20 ona.

“Ha’u fase semana ida dala tolu, tanba ha’u tama iha kategoria rins krónika, ne’ebé ikus ona. Ami tratamentu dala tolu kada semana durante oras haat nia-laran”, Octavio dehan.

Jornalista : Felicidade Ximenes

Editór : Zezito Silva