Vítima dezastre naturál 156 hosi Baucau simu materiál rekuperasaun
BAUCAU, 25 setembru 2023 (TATOLI) – Vítima dezastre naturál hamutuk uma-kain 156 iha munisípiu Baucau simu materiál rekuperasaun hosi Sekretaria Estadu Protesaun Sivíl.
Sekretáriu Estadu Protesaun Sivíl, Domingos Mariano Reis, esplika, hafoin simu pose loron tuir mai Timor-Leste hasoru dezastre naturál ne’ebé afeta ba territóriu laran tomak inklui ho tinan-2022 nian ne’ebé seidauk hetan apoia nune’e governu liuhosi orsamentu retifikativu aloka orsamentu hodi rekupera hikas uma komunidade ne’ebé hetan dezastre naturál.
“Sira simu la hanesan bazea ba kategoria, ne’ebé aat totál pakote tomak la hanesan ho natoon no kmaan inklui nominál orsamentu mão de obra ne’ebé diferente,” Sekretáriu Estadu Protesaun Sivíl hateten iha Vila Nova, segunda ne’e.
Hosi totál númeru refere iha Baucau hetan ajuda ho kategoria aat totál hanesan simentu 50, kalen 50, besi beton, besi baza, pregu, marteru, metru, balde natoon. Enkuantu aat kmaan materiál kada uma-kain simu hanesan pregu, martelu, kalen no osan.
Hosi totál vítima uma-kain rihun rua resin governu ajuda ona iha munisípiu Lautém, Dili, Liquiçá, Ermera, Suai, Viqueque inklui Baucau no iha semana ne’e tuir planu sei rezolve hotu munisípiu seluk ne’ebé seidauk hetan ajudu materiál rekuperasaun.
“Harii uma tenke sees hosi fatin risku hanesan labele besik ai-hun, tasi ninin, mota, foho no rai halai atu nune’e iha fatin seguru hodi garante moris família nian,” Governante ne’e fó hanoin ba vítima dezastre naturál sira.
Prezidente Autoridade Munisipál (PAM) Baucau, Olivio ‘Bou-Lesa’ Freitas, fo-sai lia menon atu benefisiáriu sira uza materiál no orsamentu hodi konstrui uma ne’ebé hetan dezastre naturál no hadook hosi fatin risku tanba sei la ajuda tán ba dala-rua.
“Simplesmente bele repoint ba saida mak vítima sira sofre atu bele iha fali uma ida,” Bou-Lesa hateten.
Vítima dezastre naturál Matias Soares Gusmão hosi aldeia Lamegua, suku Bahu, postu Baucau Vila, sente kontente no agradese ba Governu tanba bele ajuda hakmaan ona todan ne’ebé nia sentE tanba materiál refere sei re-konstrui hikas uma ne’ebé antes ne’e hetan sunu.
“Simu ona entaun aban ka bainrua bele konstrui ona,” Matias akresenta.
Hosi uma-kain 156 komposta hosi postu admistrativu Baucau vila 52, Venilale 14, Laga 31, Quelicai 14, Vemasse haat no Baguia hamutuk uma-kain 41 ho ketegoria aat tótal hamutuk uma-kain 21, natoon 37 no kmaan 98.
Kada uma-kain simu mos orsamentu mão de obra ho tótal $107.550 kompostu aat tótal rihun $21, natoon rihun $27.750 no aat kmaan hamutuk orsamentu rihun $ 58.800 ne’ebé kada uma-kain aat tótal simu rihun $1, natoon $750 no aat kmaan $ 500.
Jornalista : Natalino Belo
Editór : Evaristo Soares Martins
