Top

AMC forma ona ekipa atu rejista kandidatu xefe suku

Sekretáriu Administrasaun Munisípiu Covalima, Francisco de Jesus Alves. Imajen Tatoli/Celstina Teles.

COVALIMA, 27 setembru 2023 (TATOLI)–Administrasaun munisípiu Covalima (AMC) hamutuk ho Sekretáriu Tékniku Administrasaun Eleitorál (STAE) no Komisaun Nasionál Eleisaun (CNE, sigla Portugés) tun ba terrenu hodi rejista sidadaun ne’ebé hakarak kandidatu ba xefe suku.

“Ita sei tun dirreta ba suku sira tanba Administrasaun Munisípiu Covalima (AMC) forma ona ekipa atu tun direta, nune’e STAE mak halo rejistu ba sidadaun ne’ebé atu kandidata-aan ba xefe suku,” Sekretáriu Administrasaun Munisípiu Covalima, Francisco de Jesus Alves, hateten ba Agência Tatoli, iha nia servisu fatin Sukaer Laran, kuarta ne’e.

Administrasaun munisípiu Covalima liuhosi administradór ho sekretáriu administrasaun fahe ekipa ba diretór munisipál tun apoiu halo monitorizasaun, tanba STAE hala’o ona rekrutamentu pesoál apoiu suku (PAS).

“Governu liuhosi konsellu ministru aprova ona kalendáriu kandidatu xefe suku sei rejistu iha loron 13 outubru 2023 no iha 28 outubru 2023 ita sei hala’o eleisaun no iha loron 29 outubru 2023 sei hala’o apuramentu final,” nia dehan.

Aleinde ne’e, ba xefe aldeia sira atu kandidata sira-nia aan rejista no iha 28 outubru hafoin kontinua hala’o votasaun tanba eleisaun xefe suku define ona buletin tolu mak buletin votu ba xefe suku, xefe aldeia no delegadu ka delgada sira.

Ho nune’e, preparasaun munisípiu atu hala’o eleisaun suku ne’ebé hala’o sensibilizasaun eleisaun suku no lei suku ne’ebé durante hala’o sensibilizasaun no iha suku Dato Tolu ne’ebé seidauk konsege hala’o sensibilizasaun.

Durante hala’o sensibilizasaun lei suku konvida de’it membru konsellu suku hodi konsentra enkontru iha postu administrativu-sira, ho nune’e sei kontinua hala’o sensibilizasaun hodi fahe informasaun eleisaun suku no lei suku tanba laiha mudansa.

Tuir dadus hosi Sekretáriu Tékniku Administrasaun Eleitorál (STAE) Covalima, totál eleitór hosi munisípiu Covalima ne’ebé mai hosi postu Administrativu Fatululik, Fatumea, Fohorem, Fatumea, Tilomar, Maucatar, Zumalai no Suai hamutuk 49,469 ne’ebé kompostu hosi mane hamutuk 2,5220 no feto hamutuk 2,4216.

Aleinde ne’e, STAE mós rejista eleitór mate iha munisípiu Covalima hamutuk na’in-353 kompostu hosi mane na’in-186 no feto na’in-167.

Enkuantu, bazeia ba dadus iha tinan 2022, STAE Covalima rejista eleitór elizível hamutuk 48,830 ne’ebé kompostu hosi mane 24,950 no feto 23,880.

Jornalista : Celestina Teles

Editór       : Cancio Ximenes

Publisidade

Leave a Reply

Latest Post

error: Content is protected !!