Empreza Hong Kong hakarak investe Agency Insurance iha TL
DILI, 27 setembru 2023 (TATOLI) – Empreza internasionál ho naran Toscafund hosi nasaun Hong Kong hakarak investe Agency Insurance iha Timor-Leste hodi fasilita timoroan sira bainhira hetan dezastre.
“Primeira-vez, ami mai iha ne’e, ami mai hasoru malu ho Prezidente Repúblika José Ramos Horta hodi ko’alia kona-ba futuru ami hakarak loke Agency Insurance iha Timor-Leste”, Diretór Jerál Investimentu hanesan mós Diretór Ezekutivu kompaña Toscafund dehan ba jornalista sira iha Palásiu Prezidénsia, kuarta ne’e.
Nia dehan, bainhira Estadu Timor-Leste autoriza sira bele hahú loke sira-nia atividade hanesan Agency Insurance hodi fasilita timoroan sira.
“Timor-Leste ne’e nasaun estavél no di’ak, entaun ita iha hanoin di’ak atu dezenvolve ba oin liu hosi saida mak timoroan sira bele”, nia dehan.
Nia hatutan, la’os de’it iha Insurance maibé posibilidade bele investe liután iha área seluk ne’ebé bele fó benefísiu ba Timor-Leste nia dezenvolvimentu.
Jornalista: Hortencio Sanchez
Editór : Zezito Silva
