Xefe Estadu simu vizita hosi Tenison Wood College
DILI, 27 setembru 2023 (TATOLI) – Prezidente Repúblika José Ramos-Horta simu vizita espesiál hosi estudante hosi eskola Tenison Wood College hosi Austrália.
“Hasoru malu ho Prezidente Repúblika lori ho estudante sira hosi Tenison Wood College tanba ami dala-10 ona mai vizita Timor-Leste iha eskola sira hosi munsípiu hodi hala’o programa estuda hamutuk hanesan semana kotuk ita lansa ona iha Turiscau Manufahe no atu hala’o fali atividade hanesan iha eskola balu iha Hatulia Ermera”, Diretora eskola Tenison Bernadette, dehan ba jornalista sira iha Palásiu Prezidensiál, kuarta ne’e.
Programa estuda hamutuk entre estudante sira hosi eskola Timor-Leste nian atu komunika ka introdús ba malu ho lian inglés.
“Atividade ida ne’e importante tebes ba estudante sira liuliu iha Turiscai no Hatulia atu hatene liután lian inglés”, nia dehan.
Nia husu ba eskola iha Hatulia atu haruka estudante no mestre balu atu ba vizita eskola Diretora eskola Tenison durante semana ida atu haree direta metódu hanorin ba labarik sira iha tempu eskola.
“Prezidente Repúblika rona ami nia liafuan no pedidu hotu no Prezidente fó mós nia hanoin oinsa dezenvolve liután programa ida-ne’e atu fasilita estudante timoroan sira bele ko’alia inglés ho di’ak liu”, nia relata.
Tanba ne’e, Prezidente Repúblika husu atu atividade ne’e labele hala’o de’it iha eskola rua maibé bele loke liras mós ba eskola sira iha munisípiu seluk.
Jornalista: Hortencio Sanchez
Editór : Zezito Silva
