Bee ba Rusa iha Parke Nasionál Nino Konis Santana hela litru 4000-resin

DILI, 28 setembru 2023 (TATOLI) – Jestór Parke Nasionál Nino Konis Santana no área protejida Lautém, António da Fonseca, hateten fornesimentu bee ba Rusa sira iha área Parke Nasionál Nino Konis Santana hela de’it litru 4.000-resin.
“Sim, loos, ita-nia rusa sira ne’e hahú hamlaha, tanba kuandu rusa sente hamlaha sira mai hemu tasi ben ona, entaun ita iha bee ne’ebé atu fornese ba ita-nia rusa sira-ne’e iha 6.000 litru, iha fulan ida ne’e, ita interven ona litru 2.000 no agora ita sei iha bee ne’ebé atu fornese ba ita-nia rusa sira iha ne’e hela de’it litru 4.000-resin”, António da Fonseca hateten ba TATOLI via telephone.
Nia dehan, tanke ne’ebé mak konstrui iha Parke Nasionál Nino Konis Santana ne’e iha fatin rua, ida halo de’it iha li’ur no ida iha uma laran. Tanke ida ne’ebé konstrui iha li’ur ne’e akumula bee tanke ida konstrui iha uma laran ne’e litru 4.000-resin.
“Kuandu tempu udan, ami konserva bee sira ne’e ho di’ak, tanke ne’ebé iha li’ur, tantu tanke ne’ebé iha uma laran ne’e, ami ense nakonu no ami konserva halo didi’ak, kuadu ita-nia rusa sira tempu hamrok ita tenke halo intervensaun”, nia dehan.
“Foin daudaun, ha’u halo postajen (post) iha facebook, ita nia rusa hamrok ona, kuandu sira sente hamrok ne’e sira tenke mai hemu tasi been no ha’u hatene halo kedan intervensaun bee ba sira ita ho bee litru 2.000 ona, ita hela de’it provizóriu bee ho litru 4.000”, nia subliña.
Nia dehan, ho bee litru 4.000 ne’e sufisiente hodi uza halo intervensaun.
“Rusa sira-ne’e nia hahan depende ba ai-tahan, maibé kona-ba bee ho litru 4.000-resin ne’e sufisiente, tanba ita tenke uza hotu bee sira ne’e hotu mak ita foin husu ajuda ba nasionál hodi halo intervensaun lori bee mai”, nia haktuir.
António da Fonseca, hateten previzaun bee ho litru litru 4000-resin ne’e sei hotu iha novembru, tanba iha fulan oin, sei interven tán litru 2.000 ba rusa atu hemu no ba fulan novembru automatikamente sei oferese tan litru 2.000 ba rusa, nune’e rusa sira labele hamrok.
“Tuir tempu normál, iha Parke Nasionál Nino Konis Santana depois loron 2 fulan novembru udan tenke monu rai, maibé kuandu lae tanba kestaun mudansa klimátika, entaun tenke husu ona ajuda ba nasionál hodi Governu intervene atu bee mai iha Parke Nasionál Nino Konis Santana hodi fornese ba ita-nia rusa sira ne’e”, nia informa.
Hatan kona-ba rusa balun mate tanba hamrok, Jestór Parke Nasionál Nino Konis Santana no área protejida Lautém, António da Fonseca nia seidauk rejista rusa mate.
“Ida ha’u haree ho matan katak rusa mate ne’e laiha, maibé normalmente kuandu balada hanesan rusa mak liu ona númeru 100 ba leten ne’e iha ida rua tenke mate”, nia konklui.
Jornalista: Natalino Costa
Editór : Zezito Silva

