DILI, 28 setembru 2023 (TATOLI)—Ekipa avaliasaun Grupu Asia Pasífiku (APG, sigla inglés) ba brankeamentu Kapitál no finansiamentu terorizmu, kinta ne’e, hasoru malu ho Primeiru-Ministru (PM), Kay Rala Xanana Gusmão.
“Timor-Leste sai membru APG iha tinan 2008. Tanba ita sai membru, entaun rekezitu ne’ebé ita tenke prienxe maka sira mai halo avaliasaun sobre kritériu sira ne’ebé ligadu ho brankeamentu kapitál. Primeiru-Ministru partikularmente hato’o ba ekipa APG, kompromisu Timor-Leste katak ita komprometidu atu implementa sistema ne’ebé kumpre padraun brankeamentu kapitál no finansiamentu terorizmu,” Governadór Banku Sentrál Timor-Leste (BCTL, sigla portugés), Helder Lopes, relata hafoin akompaña Xefe Governu reuniaun ho ekipa APG, iha Gabinete Fronteira Marrítima, iha Palásiu Governu, kinta ne’e.
Notísia relevante : MJ realiza semináriu prevene brankeamentu kapitál no finansiamentu terrorizmu
Timor-Leste hakarak implementa padraun no sistema loloos, inklui prienxe rekezitu ba prátika money laundry nomós finansiamentu terorizmu labele akontese iha rai-laran.
Nune’e, Xefe ezekutivu husu ba Banku Sentrál atu kompila hamutuk informasaun hosi APG hodi halo aprezentasaun ida iha reuniaun Konsellu Ministru, nune’e membru Governu sira bele iha informasaun kona-ba asuntu ne’e.
“Ha’u hakarak informa ba públiku katak ita iha komisaun nasionál ba anti brankamentu kapitál ne’ebé lidera hosi Ministru Justisa, Ministru Negósiu Estranjeiru no Kooperasaun no BCTL nu’udar membru. Hirak ne’e serbisu hamutuk hodi labele akontese brankamentu kapitál no finansiamentu terrorizmu iha rai-laran,” nia dehan.
APG kompostu hosi nasaun oin-oin ne’ebé durante loron hirak ona iha Timor-Leste hodi hasoru malu ho Autoridade Judisiáriu, Autoridade Finanseira, entidade hosi setór bankária nomós autoridade públiku sira seluk ne’ebé relevante, hodi hetan informasaun hosi entidade hirak ne’e atubele hatene Timor-Leste nia implementasaun atu kumpre anti money laundry to’o iha ne’ebé ona.
“Depois hosi ne’ebá mak sira fó rekomendasaun mai ita para ba oin ita implementa rekomendasaun sira ne’ebé apoia mai ita, hodi nune’e ita bele hadi’a sistema anti money laundry no kontra finansiamentu terrorizmu,” nia subliña.
Jornalista : Antónia Gusmão
Editora : Julia Chatarina
