Top

MI ho Komandu PNTL hahú halo revizaun ba kuríkulu

Ministru Interiór, Francisco da Costa Guterres. Imajen Tatoli/Francisco Sony

DILI, 28 setembru 2023 (TATOLI) – Ministu Interiór, Francisco da Costa Guterres, dehan Ministériu Interiór (MI) hamutuk ho Komandu PNTL hahú diskute atu halo revizaun ba kuríkulu foun polísia nian atu bele lori membru sira no dezenvolve instituisaun PNTL ho di’ak liután iha futuru.

Governanate ne’e dehan, PNTL eziste kle’ur ona, presiza muda ninian kuríkulu, oinsá redefine fali kuríkulu foun ne’ebé maka bele koresponde ba situasaun Timor-Leste nian hodi uza atu dezenvolve instituisaun PNTL iha futuru.

“Kuríkulu ida ne’ebé di’ak no ideal hodi serve instituisaun PNTL nian, maka ita lalika ba foti kuríkulu hosi nasaun seluk nian hanesan Austrália no mós Portugál nian, PNTL foti kuríkulu ida ne’ebé tuir duni natureza timor nian hodi bele responde ba PNTL nia kapasidade atu halo atuasaun ba situasaun ida agora ne’e”, Francisco Guterres hateten ba jornalista sira hafoin partisipa workshop ba revizaun kuríkulu, ne’ebé hala’o iha Sentru Formasaun Polísia (CFP, sigla portugés), Comoro, kinta ne’e.

Nia esplika, PNTL nia kuríkulu tenke halai liubá karater PNTL nian agora hanesan Polísiamentu Komunitáriu liuliu atu halo diálogu ho komunidade hodi mantein sira-nia disiplina.

“Polísia tenke amizade ho komunidade, la’o hamutuk no konversa ho komunidade liuliu joven sira maibé rekoñese aan hanesan membru PNTL ne’e mak importante katak sempre hakbesik aan ba komunidade atu la’o tuir dalan di’ak”, nia hateten.

Tanba kuandu polísia tún hodi halo atuasaun, sempre uza forsa, maibé iha situasaun ameasadu PNTL tenke uza forsa atu dudu sees tiha ida iha forsa ne’e atu labele oho ema.

“Ha’u agradese ba Komandu Jerál PNTL bele foti kuríkulu ida ne’ebé tuir duni nesesidade ne’ebé PNTL iha, tanba ne’e mak ohin ha’u mai loke abertura ba workshop ida-ne’e”, nia dehan.

Iha fatin hanesan, Segundu Komandante Jerál PNTL Komisáriu Polísia Pedro Belo, afirma PNTL la’o ona tinan 23 tanba ne’e Komandu fó Formasaun ba planu revizaun ba kuríkulu PNTL nian.

“Durante PNTL eziste tinan 23, ita presiza halo avaliasaun ba ita-nia servisu durante tinan 23, ema barak kritika ita tanba ne’e presiza haree fila fali kuríkulu, tanba saida mak komunidade kritika makas ita-nian servisu liuliu dehan violasaun direitu umanu”, nia dehan.

Nia rekoñese, PNTL durante ne’e uza forsa barak liu, maibé mundu ida agora la«os ona uza forsa maibé uza ibun.

“Ita tenke haree ita-nia étika komunikasaun ne’ebé ladún di’ak ba ita-nia komunidade tanba ne’e ita-nia kuríkulu mós presiza hadia, sé bele iha materia ne’ebé iha kuríkulu laran ne’e halai liubá étika”, nia salienta.

Belo hateten, tempu ona ba insititusaun PNTL atu hadia sistema hanorin liuliu bainhira polísia tún ba halo atuasaun labele uza forsa hodi defende ita-nia aan no bainhira ema ne’ebé la treinadu labele uza forsa hasoru nia, ida-ne’e mak materia ida ne’ebé karik bele hatama iha kuríkulu atu nune’e polísia bele servisu ho di’ak.

Jornalista: Natalino Costa   

Editór : Zezito Silva

Publisidade

Leave a Reply

Latest Post

error: Content is protected !!