Xanana-Horta diskute folin foos
DILI, 28 setembru 2023 (TATOLI) – Xefe Governu Kay Rala Xanana Gusmão hasoru malu ho Prezidente Repúblika José Ramos-Horta hodi ko’alia kona-ba folin foos ne’ebé sae makas iha Timor-Leste.
“Ami diskute makas kona-ba oinsa atu hatún presu foos no sei hasai rezolusaun ida hodi kontrola kuantidade liuliu ba ema sira fan foos ne’e, ita tenke kontrola halo didi’ak antes Governu fó subsídiu ida atu bele hatún foos nia folin”, Xanana dehan ba jornalista sira iha Palásiu Prezidensiál, kinta ne’e.
Nia fó hanoin fali katak problema foos ne’ebé akontese hanesan problema ne’ebé akontese ona iha 2008 bainhira krize mundiál foos liuliu iha Ázia.
Antes ne’e folin foos iha merkadu kilograma 20 ho folin $12, maibé atualmente kilograma 20 sae ba $17 no kilograma 25 sae ba $20.
Tuir planu Governu nian, sei fó subsídiu ba empreza importadór sira hodi bele normaliza presu foos ne’ebé kilograma 20 ho folin $17 bele tun ona ba presu normál $12.
Jornalista: Hortencio Sanchez
Editór : Zezito Silva
