DILI, 28 setembru 2023 (TATOLI) – Prezidente Repúblika José Ramos-Horta kondekora doutór Vincent Braganza hanesan médiku espesialista iha sirurjia ho medalla orden kolar Timor-Leste hodi valoriza nia dedikasaun ba Timor-Leste iha área saúde hodi salva timoroan barak nia vida durante tinan 10.
“Desizaun ne’e foti hodi kondekora doutór Vincent Braganza tanba tinan 10 ona nia mai iha Timor-Leste hodi hala’o servisu sirurjia iha Hospitál Nasionál Guidu Valadares no iha mós Baucau, Lautem, Covalima no seluk tan hodi salva timoroan nia sira-nia vida”, Horta dehan iha diskursu bainhira atribui medalla ba doutór Vincent Braganza iha Palásiu Prezidensiál, kinta ne’e.
Doutór Vincent Braganza sei kontinua hala’o nia misaun iha Timor-Leste iha HNGV iha fatin sirurjia nian hodi atende timoroan sira ne’ebé sofre moras ho voluntáriu no konsege ajuda ona timoroan sira ne’ebé moras halo transferénsia ba halo tratamentu iha estranjeiru.
La’os de’it iha HNGV no munsípiu maibé doutór Vincent Braganza durante ne’e hala’o knar mós iha Ospitál Bairru-Pite.
Medalla ne’e atribui bazeia ba dekretu lei nú 20/2009, 16 maiu hodi fó rekoñesimentu ba ema estranjeiru sira ne’ebé dedika aan hodi servisu ba Timor-Leste nia benefisiu.
Kondekora ne’e mós bazeia ba Konstituisaun Repúblika Demokrátika Timor-Leste (RDTL) artigu 85 alinea J.
Iha okaziaun ne’e, doutór Vincent Braganza agradese ba Estadu Timor-Leste ne’ebé kondekora ona nia ba servisu ne’ebé durante ne’e nia halo.
“Agradese ba Estadu Timor-Leste no Prezidente Repúblika tanba kondekora ona ha’u, maibé hanesan médiku kontinua nafatin hala’o servisu ho profisionál hodi salva ema nia vida”, nia hatete.
Jornalista: Hortencio Sanchez
Editór : Zezito Silva
