Horta enkontru ho empreza All-China Federation of Industry
DILI, 29 setembru 2023 (TATOLI) – Prezidente Repúblika José Ramos Horta enkontru ho Prezidente Empreza Internasionál All-China Federation Of Industry and Commerce, China Chamber Of Commerce for Petroleum Industry Geng Guoyong hodi ko’alia kona-ba kooperasaun hodi dezenvolve mina no gas iha Timor-Leste.
“Hasoru malu ho Prezidente Repúblika tanba fó konvite ba ami atu mai ko’alia kona-ba oinsa bele halo kooperasaun hodi dezenvolve mina no gas iha Timor-Leste”, Geng dehan ba jornalista-sira iha Palásiu Prezidensiál, sesta ne’e.
Empreza ne’e, hakarak tebes atu investe iha Timor-Leste maibé depende ba prosesu negosiasaun ho Estadu Timor-Leste.
Antes ne’e, empreza Xinez ne’e hasoru malu ona ho Primeiru-Ministru Kay Rala Xanana Gusmão hodi ko’alia kona-ba dezenvolvimentu iha mina no gas.
Nune’e, empreza mós hakarak investe iha transportasaun, merkadu no komérsiu internasionál Timor-Leste ba Xina no mós nasaun seluk maibé foku mak investe iha mina no enerjia renovavel. Tanba ne’e, ami sei introdús mós empreza seluk hosi Xina ba Timor-Leste tanba ami hotu iha mahon Federasaun Komérsiu Xina nian.
Empreza sei halo diskusaun kle’an ho Ministériu Petróleu Rekursu no Minerál (MPRM) kona-ba bloku sira ne’ebé mak Governu promove no halo ona konkursu públiku. Maske nune’e, molok avansa ba oin presiza iha akordu ruma kona-ba investimentu ne’e.
Jornalista: Hortencio Sanchez
Editór : Zezito Silva
