OMS ofisialmente entrga vasina rabies 1.000 ba MS
DILI, 29 setembru 2023 (TATOLI) – Organizasaun Mundiál Saúde iha Timor-Leste entrga ona vasina rabies 1.000 dozes ba Ministériu saúde hodi vasina ba ema ne’ebé mak risku aas.
“Ami ofisilamente entrega ona vasina rabies ba Ministériu Saúde iha loron 14 fulan setembru hodi vasina ba ema ne’ebé mak risku aas ka ba ema sira ne’ebé vuneravél”, reprezentante Organizasaun Mundiál Saúde iha Timor-Leste, Arvind Mathur dehan ba TATOLI iha nia kna’ar fatin Caicoli, ohin.
Nia hateten, risku aas mak ba ema sira ne’ebé mak servisu diretamente ho animal, hanesan sira iha Ministériu Agrikultura no Peska iha área veterenaria nian ka servisu iha área fronteira ka Indonézia nia.
“Vasina rabies ida-ne’e ita-nia tarjetu ba sira ne’ebé mak servisu besik liu animál no mós ba sira ne’ebé mak servisu iha área fronteira Indonézia nian”, nia afirma.
Nia haktuir, vasina ne’e mós bele vasina ba ema sira ne’ebé mak antes ne’e tata ona husi animál sira, entaun Timor-Leste la iha kazu ba ida-ne’e zero kazu rabies.
“Vasina ne’ebé ita lori mai ne’e hanesan etapa preventivu de’it karik ita konsege iha kazu mak ita uza de’it ona hodi responde ba moras ida-ne’e”, nia subliña.
OMS durante ne’e apoia Ministériu Saúde lihosi hasa’e konsiénsia ema nian liuhosi informasaun sira ne’ebé mak OMS fahe liuhosi brosura ba moras rabies ida-ne’e.
“Ida seluk mak fó treinamentu pesoál saúde sira kona-ba rabies no oinsá atu prevene moras rabies rasik. entaun vasina ne’e ita fó ba ema idade hotu banhira hetan tata husi animál ne’e rasik, agora daudaun vasina ne’ebé mak ita lori mai ne’e ba ema sira ne’ebé mak iha área risku nian”, nia konklui.
Jornalista : Felicidade Ximenes
Editór : Zezito Silva
