Timor-Leste-Japaun realiza diálogu polítiku
DILI, 29 setembru 2023 (TATOLI) – Governu Timor-Leste organiza diálogu polítiku iha nível Diretór Jerál atu diskute área prioridade kooperasaun Asistensia Ofisiál Dezenvolvimentu (ODA) hosi Japaun ba Timor-Leste.
“Durante diálogu polítiku ne’e, diskute kona-ba situasaun ekonómiku Timor-Leste, desafiu no polítika dezenvolvimentu, área prioridade no dezafiu ba Asosiadu ASEAN”, hatete iha komunikadu ne’ebé Agência TATOLI asesu hosi media MNEK, ohin.
Dialogu politiku ne’e, Timor-Leste lidera hosi Diretór Jerál Asuntu Bilaterál Ministériu Negósiu Estranjeiru no Kooperasaun (MNEK), Marcos da Costa no Diretór Jerál Ministériu Finansa (MF), Francisco da Silva.
Enkuantu delegasaun Japaun lidera hosi Kamoshida Naoki, Diretór Primeira Divizaun Planeamentu Asisténsia ba Nasaun Seluk, Ajénsia Kooperasaun Internasionál Ministériu Negósius Estranjeiru Japaun, ne’ebé hamutuk ho Embaixadór Japaun iha Timor-Leste, Kimura Tetsuya, Adjuntu Ulun Misaun Embaixada Japaun, Yamada Kazumi, Diretór JICA Taimio Shinya no delegasaun seluk.
Polítika Japaun nian kona-ba ODA ba Timor-Leste no mós troka opinião kona-ba área prioridade no projetu individuál.
Sesaun diálogu ne’e mós asiste hosi Diretór Jerál Asuntu ASEAN, Elisa da Silva, Diretór Jerál Ministériu Transporte no Telekomunikasaun, Constantino Soares.
Jornalista: Hortencio Sanchez
Editór : Zezito Silva
