DIli, 29 setembru 2023 (TATOLI) – Prezidente Repúblika, José Ramos-Horta parabeniza ba komunidade Xineza hotu ne’ebé hela iha Timor-Leste ne’ebé komemora loron nasionál ba dala-74.
“Komesa hosi 2003 Xina oferese apoiu barak tebes ba Timor-Leste, hanesan apoiu ho montante millaun $ 743,1 hodi hadi’ak infrastrutura, ekipamentu saúde no seluk tan’’, Xefe Estadu Ramos-Horta, hateten iha selebrasaun aniversáriu Xineza iha Embaxada Xina, kinta kalan.
Prezidente mós rekoñese kontribuisaun Xina durante pandemia no agora timoroan barak mak eskola iha Xina, inklui vizita foin lalais husi Ró-Ospitál Xina “Peace Ark” ne’ebé mai Timor-Leste hodi fó tratamentu ba timoroan sira.
Prezidente rekuñese Xina nia kontribuisaun lubuk ida iha prosesu ukun rasik-an, liuliu Xina hanesan membru permanente iha konsellu seguransa ONU nia ne’ebé apoiu direitu timoroan nian hodi hetan independénsia.
Xina hanesan mós nasaun primeiru ida ne’ebé mak estabelese relasaun diplomátiku iha loron dahuluk hafoin restaurasaun independénsia Timor-Leste.
Prezidente apresia tebes esforsu no kontribuisaun hirak ne’e hotu no espera ba oin, bele iha estratéjia médiu no longu prazu ba kooperasaun bilaterál entre Timor-Leste no Xina hodi apoiu dezenvolvimentu nasaun rua ne’e no nia ema sira.
Jornalista: Hortencio Sanchez
Editór : Zezito Silva
