Manny Pacquiao observa direta Klube Boxe iha Timor-Leste
DILI, 30 setembru 2023 (TATOLI) – Boxista Lendáriu Manny Pacquiao konsege vizita klube Boxe hamutuk tolu hodi observa direta situasaun Boxe iha Timor-Leste.
Klube Boxe tolu ne’ebé Manny Pacquiao vizita mak Benfica, Dili Boxe no El-Matador.
Boxita Filipino ne’e hahú vizita dala uluk ba Benfica ho kareta kor metan ho númeru matríikula 18:538G ne’ebé hetan seguransa másimu hosi Polísia Nasionál Timor-Leste (PNTL) hosi Unidade Espesiál Polísia (UEP).
Pacquiao hahú vizita iha oras tuku 18:52 otl kada klube nia vizita menutu 10.
Bainhira to’o iha klube Benfica Colmera Dili, ema kuaze rihun-ida resin mak hein simu, balun hadau malu hasai fotografia no atleta Boxe hosi klube Benfica halo atrazu tuir kultura Boxe nian.
Durante menutu 10 iha Benfica, Pacquiao halo observasaun ba fatin treinamentu Boxe nian no hasai fotografia ho Boxista timoroan sira.
Hafoin konklui vizita ba Benfica, Pacquiao kontinua fali nia vizita ba Dili Boxe iha Bidau-Tahularan hodi observa direta kondisaun klube Tahularan nian.
Bainhira to’o Tahularan, ema kuaze rihun ba rihun mak hein iha dalan ninin ho lian makas hakilar Pacquiao nia-naran.
Boxita internasionál ne’e hakat kedan ba edifísiu Dili Boxe nian hodi asiste atrasaun ne’ebé hatudu iha rin leten entre atleta Boxe sira hosi klube Dili Boxe.
Hafoin ida-ne’e, Pacquiao semo liu fali ba klube El-Matador Boxe iha Bidau Lecidere Dili hodi hasoru malu ho atleta Boxe no dirijente estrutura El-Matador nian iha Hotel Ventura.
Bainhira to’o iha Hotel Ventura, estrutura klube El-Matador ne’ebé simu Boxista ne’e ho di’ak no lori kedan tama ba fatin treinamentu El-Matador nian.
To’o iha fatin, estrutura El-Matador oferese kedan piala Boxe nian ida ba lendáriu ne’e hodi marka asinatura no aprezenta mós imajen lubuk ida ba Boxista Filipino ne’e asina durante menutu 10 iha Hotel Ventura.
Aleinde asina piala no imajen, Pacquiao mós marka nia asinatura ba atleta Boxe no estrutura El-Matador nia faru hodi husik hela hanesan rekordasaun hosi Boxista Lendáriu ne’e.
Ramata vizita iha El-Matador, Pacquiao hakat liu kedan ba Legendariu Lecidere hodi jantar hamutuk ho lider boot sira Timor-Leste nian no oras to’o ba deskansa iha Hotel Timor Plaza.
Konselleru El-Matador Juvinál Dias agradese ba prezensa Paquiao nian bele vizita ona El-Matador.
“Ami espera katak ho prezensa ida Manny Pacquiao nian bele fó motivasaun di’ak liután ba ami nia Boxista sira atu hakas aan liután to’o mehi tanba durante ne’e El-Matador prepara ona Boxista lubuk ida ne’ebé reprezenta Timor-Leste hanesan Delio Mouzinho no seluk tan”, nia hateten.
Ho prezensa Pacquiao nian bele hasae liután espiritu El-Matador nian atu prodúz Boxista sira iha futuru.
“Tempu besik, ami sei fó ami-nia proposta lubuk ida atu Pacquiao sai hanesan promotór ba Boxista Timor-Leste nune’e bele sai profesionál liután, ida-ne’e mak ami-nia proposta atu bele iha kolaborassun entre Manny Pacquiao Prodution Management ho El-Matador”, nia hakotu.
Jornalista: Hortencio Sanchez
Editór : Zezito Silva
