DILI, 02 outubru 2023 (TATOLI)—Deputadu bankada CNRT iha Parlamentu Nasionál (PN), Natalino dos Santos, husu Governu liuhosi Ministériu Obra Públika (MOP) atu monitoriza konstrusaun uma andar iha Dili.
Deputadu ne’e apresia tebes liuliu iha Dili laran, uma andar barak komesa harii daudaun hosi emprezáriu ka emprezária sira mai hosi rai-li’ur.
“Haree uma andar sira-ne’e harii andar haat ka lima ho besi ka baja de’it la kle’ur to’o fulan ida ka rua hotu tiha ona. Entaun, ha’u la’ós enjiñeiru, kondisaun ida-ne’e presiza haree ka lae. MOP halo akompañamentu ba konstrusaun sira-ne’e ka lae, nia kualidade di’ak ka lae, iha dezeñu ka lae, konstrusaun ne’e dala barak halo besik estrada ninin, ida-ne’e nia implikasaun oinsá. Tanba ne’e, hakarak bolu atensaun ba MOP atu monitoriza, haree oinsá konstrusaun ida atu halo,” nia levanta liuhosi reuniaun plenária PN, segunda ne’e.
Tanba, nia hateten, bainhira akontese rai nakdoko ruma mak uma andar hirak ne’e bele implika vítima barak
“Ha’u foti preokupasaun ne’e, tanba iha preokupasaun ita-nia sidadaun sira-ne’ebé barak preokupa tebes ho situasaun ne’e,” nia hateten.
Deputadu Fretilin, Óscar Lima, sekunda konstrusaun uma andar hakfodak mai uma andar lima ka neen prontu ona, hanoin MOP presiza haree tanba ne’e perígu.
Vise Ministru ba asuntu Parlamentár, Adérito Hugo da Costa, rejista preokupasaun ne’e sei enkamña ba ministériu tutela.
Jornalista : Nelson de Sousa
Editór : Cancio Ximenes
