iklan

EKONOMIA, INTERNASIONÁL, DILI, HEADLINE

Horta hasoru malu ho Diretora Jerál OMK

Horta hasoru malu ho Diretora Jerál OMK

Prezidente Repúblika, José Ramos-Horta. Imajen Tatoli/Francisco Sony

DILI, 03 outubru 2023 (TATOLI) – Prezidente Repúblika, José Ramos Horta, hala’o sorumutu ho Diretora-Jerál Organizasaun Mundiál Komérsiu (OMK), Ngozi Okonjo-Iweala, iha Jeneva hodi ko’alia kona-ba Timor-Leste nia adezaun ba OMK no ASEAN.

“Enkontru ne’e foka ba esforsu Timor-Leste nian atu tama OMK no ASEAN, ne’ebé deskreve hanesan prioridade nasionál absoluta no asuntu konsensu nasionál”, hatete iha komunikadu ne’ebé Agência TATOLI asesu hosi media Prezidente Repúblika, tersa ne’e.

Prezidente Ramos Horta espresa nia gratidaun ba Diretór-Jerál ho nia ekipa, ba sira-nia apoiu no pasiénsia hodi trata komplesidade adezaun Timor-Leste nian iha organizasaun ida-ne’e.

Nia rekoñese katak instituisaun hanesan OMK presiza ema espesiál tebes no agradese Okonjo-Iweala ba nia amizade.

Diretór-Jerál Okonjo-Iweala elojia Timor-Leste nia maneira lida ho prosesu adezaun no  rekoñese dezafiu sira iha implementasaun ba reforma sira ne’ebé presiza no aprovasaun lejislativa.

Nia elojia Governu anteriór no atuál, tanba sira halo ho lalais no efisiente tebes iha preparasaun ba adezaun ASEAN no OMK.

Nia nota katak sei iha dalan balun atu Timor-Leste tama hanesan membru OMK, inklui aprovasaun lejislativa.

Maske nune’e, nia espresa konfiansa ba kapasidade Prezidente Ramos Horta atu aselera prosesu sira-ne’e.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!